خبر:
وړمه ورځ د امربالمعروف وزارت سرچینو هندوکشغږ ته وویل، چې په کابل کې یې د جادوګرو او ساحرانو هغه خطرناک بانډ نیولی، چې له اوږدې مودې راهیسې په کابل کې فعاله و او د ټولنیز نظم د اخلال، د کورنیو په منځ کې د شدیدو اختلافاتو او ټکرونو د رامنځته کېدو په موخه او دغه راز له عامو خلکو او په ځانګړې توګه له مېرمنو څخه یې د پیسو اخیستلو په بدل کې د سحر او جادو ناوړه کاروبار کاوه. د دغه بانډ غړو هم پر خپل جرم اعتراف وکړ او زیاته یې کړه چې له دې درکه یې ډېرې پیسې ترلاسه کولې.
تبصره:
په افغانستان کې د کورني او ټولنیز نظم د اخلال له ډېرو نورو لارو چارو څخه یوه هم د سحر او جادو لاره ده، چې له اوږدې مودې راهیسې ځینې کړۍ، ډلې او افراد هڅه کوي چې شته کورني نظامونه سره وپاشي، ټولنیز نظم مختل کړي، په ټولنه کې بې باورۍ او دښمنۍ ډېرې کړي او یوازې د یوڅو کسانو لپاره جرمي اقتصادي سرچینه و اوسي.
دا پدیده هم د ځینو نورو په څېر یو څه پېچلې ده، چې له بده مرغه پخوانیو حکومتونو یې نه یوازې دا چې د مخنیوي لپاره څه ونه کړل، بلکې په یو ډول یې د ترویج هڅه کوله. په افغانستان کې د سحر او جاودو د ناوړه پدیدې له کبله سلګونه او ان زرګونه کورنۍ قرباني شوي، زرګونو کسانو فرېب او دوکه خوړلې او ډېرې کورنۍ یې د غم او دښمنۍ په ټغر کېنولي دي.
په افغانستان کې د اوسني نظام په راتګ سره، د نورو برخو له نشهيي توکو، قیمار، قاچاق، اختطاف، غلا او غصب او نورو جرمونو په څېر جادو او سحر ته هم د جرم او بلکې د لوی جرم په سترګه کتل کېږي او پر وړاندې یې جدي او کوټلي ګامونه اخیستل کېږي.
په تېرو نږدې څلورو کلونو کې لسګونه او ان ښايي سلګونه کسان د دغه ناوړه پدیدې له کبله د زندان میلو ته اچول شوي او په ټولنه کې د دوی د ډېرو شریرو کارونو او هڅو مخه نیول شوې ده.
دا پدیده تر نورو ځکه خطرناکه ده، چې له یوې خوا خو کورنی او ټولنیز نظم ګواښي، کورنۍ د غمونو او ویرونو په ټغر کښېنوي، دښمنۍ او بدبینۍ رامنځته کوي، له بلې خوا یې کاروباریانو ته لا ډېر صلاحیت ورکوي، چې قربانیان چې اکثریت ښځینه دي، له هغو لا ډېره ناوړه ګټه واخلي، بلک مېل یې کړي، پیسې ترې واخلي او په ټولنیزو رسنیو د دوی د عکسونو او ویډیوګانو د خپرولو د ګواښ په بدل کې ترې نورې ناوړه غوښتنې وکړي، چې دا په خپل ذات کې ډېرو نورو سازمان یافته جرمونو ته لاره هواروي.
نو څه ډول چې د دغه پدیدې پر وړاندې حساسیتونه ډېر دي، د مخنیوي لپاره یې جدي اقدامات شوي، نور هم باید دا اقدامات ډېر شي، په ټولنه کې عامه پوهاوی ډېر شي ترڅو خلک دغو ناوړه کاروباریانو ته مراجعه ونه کړي او د دوی د مکر او فرېب په دامونو کې ګیر نه شي.