له تېرو دریو کلونو راهیسې د سرپرست حکومت مخالفین او دښمنې رسنۍ، د امریکا له لوري افغان حکومت ته د پراخو مرستو د لېږلو نغارې وهي او په هر ځای او غونډه کې د دې مرستو له لارې د سرپرست حکومت د ملاتړ ادعا کوي.
هغه څلوېښت میلیوني ډالري کڅوړې چې د دوی په ګومان هره اونۍ د امریکا له لوري د سرپرست حکومت خزانې ته ځي، یوه دروغجنه ادعا ده چې هېڅ د عقل څښتن یې په دروغ ګڼلو کې ځنډ نه کوي او نه یې مني.
دا څنګه شونې ده، هغه امریکا چې شل کاله یې د طالبانو د له منځه وړلو لپاره جګړه وکړه او میلیاردونه ډالر یې ولګول، اوس چې یې ښکاره ماتې خوړلې، خپل پخواني دښمن ته اونیزې څلوېښت میلیوني ډالري کڅوړې ولېږي او د بل هر چا په پرتله ډیره مرسته ورسره وکړي!؟
د دې خبرو د روښانه کولو او د افغان حکومت د مخالفینو د ادعاوو په اړه یوناما د ۲۰۲۳م کال د جنورۍ پر ۹مه، چې د ۱۴۰۱ کال د جدي له ۱۹مې سره سمون خوري، یو راپور خپور کړ، چې پکې ویل شوي وو: «هغه نغدې پیسې چې افغانستان ته لېږدول کېږي، تنها د دې سازمان د فعالیتونو لپاره دي او د طالبانو تر واک لاندې د افغانستان مرکزي بانک او طالبانو ته نه سپارل کېږي».
یوناما همدا راز ویلي وو چې د ۲۰۲۱م کال له ډسمبر څخه د ۲۰۲۳م کال د جنورۍ تر ۹مې پورې، شاوخوا ۱.۸ میلیارد ډالره نغدې پیسې افغانستان ته د دې سازمان او نورو نړۍوالو بنسټونو د فعالیتونو لپاره لېږدول شوې دي.
په دې راپور کې د ملګرو ملتونو سازمان ویلي، چې افغانستان ته د نغدو پیسو لېږد د نړۍوالو بانکي انتقالاتو د ګډوډۍ او د نقدیني ستونزو د حل لپاره ترسره کېږي.
اوس چې ټرمپ د امریکا د ولسمشرۍ څوکۍ ګټلې او له دې هېواده یې افغانستان ته د بهرنیو مرستو لېږد درولی، نه یوازې دا چې د سرپرست حکومت په پلانونو کې کومه ستونزه نه ده رامنځ ته شوې، بلکې برعکس اغېز یې کړی؛ د هندوکش غږ د راپور له مخې، د آمو ټلویزیون هغه میاشتنۍ سل زره ډالري بودیجه هم بنده شوې چې د امریکا د بهرنیو چارو وزارت له لوري افغانانو ته د مرستې په نوم ورکول کېدل؛ هغه ټلویزیون چې یوازینۍ موخه یې د سرپرست حکومت پر ضد د ناسمو تبلیغاتو خپرول بللی شو.
د همدې راپور پر بنسټ، هغه مالي مرستې هم بندې شوې چې د امریکا د بهرنیو چارو وزارت افغانستان انټرنیشنل ټلویزیون ته د بشردوستانه مرستو په نوم ورکولې، دغه رسنۍ یې له جدي مالي ستونزو سره مخ کړې. دا هماغه رسنۍ ده چې شپه او ورځ یې د امریکا د مرستو د پرې کېدو په اړه تبصرې کولې او بې سوادو کارپوهانو(!) یې د افغانستان حکومت د دې مرستو له بندېدو سره زیان منونکی باله.
د دې بندیزونو له امله د بشري حقونو تر عنوان لاندې ټولو رسنیو او مدني بنسټونو ته د مرستو د بندېدو ایمېلونه لېږل شوي، دا هغه رسنۍ او بنسټونه وو چې د جمهوري حکومت تر سقوط وروسته د امریکا له خوا تمویلېدل او د افغانستان د دین، ازادۍ او پرمختګ پر وړاندې یې تبلیغاتي فعالیتونه کول.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.