د سرپرست حکومت مشرتابه ټولو مؤمنانو، په ځانګړې توګه افغانانو لپاره د کوچني اختر په مناسبت د مبارکۍ پیغام خپور کړی. د مبارکۍ دا پیغام د دیني او ټولنیزو مسایلو ترڅنګ، پر مهمو نړۍوالو او هېوادنیو سیاسي مسایلو هم ورټول دی.
د مبارکۍ دې پیغام کې، په افغانستان کې د سرپرست حکومت له حاکمیت را وروسته د سرتاسري امن او سوکالۍ تأمین د مسلمان او مېړني رعیت او ولس د قربانۍ، شهادتونو، تکالیفو او زحماتو نتیجه بلل شوې او ستاینه ترې شوې ده.
د نړۍ په بېلابېلو هېوادونو کې مسلمان ولسونه د جابرو او ظالمو نظامونو تر مظالمو لاندې د محکومیت، شهادت، قربانۍ او مظلومیت ژوند تېروي، په ځانګړې توګه غزه، چې ولسونه یې د صهیونیستي رژیم تر بې سارو ظالمانه بریدونو لاندې شپې سبا کوي؛ له همدې امله د اختر په مناست د مشرتابه پیغام کې د نړۍ له ټولو مسلمانانو سره همدردي او غم شریکي شوې ده، په ځانګړې توګه د فلسطین د محکوم وضعیت په اړه غم شریکي څرګنده شوې ده.
په هېواد کې له بلخ تر کندهاره، له نیمروز تر بدخشانه د سرتاسري امنیت د تأمین په برخه کې د هېواد د درې ګونو امنیتي ارګانونو تر عنوان لاندې راټول شوي سرتېري بې شماره ستړیاوې ګالي او هر کال اخترونه او مناسبتي ورځې په خورا ډاډمن امنیت کې لمانځل کېږي، له همدې امله د اسلامي امارت مشرتابه په خپل پیغام کې د ټول نظام، په ځانګړې توګه بیا د امنیتي ارګانونو ملاتړ او حمایت کړی دی او عامو خلکو ته یې هم د ملاتړ بلنه ورکړې ده.
په اختریز پیغام کې د اسلامي شريعت پر اساس نړۍوالي او ډيپلوماټيکې اړیکې هم د پیغام مهمه برخه ده او پر دې ورټول دی، چې سرپرست حکومت د اسلامي شریعت پر بنسټ اړیکو او تعاملاتو ته ژمن پاتې شوی. دا ډیپلوماټیک پرمختګونه د قطر په دوحه کې له امریکا سره له یو تړون وروسته په نوي پړاو کې را پیل شوي، چې بیا یې پر ټوله خاوره له حاکمیت سره د متوازن سیاست په پایله کې، له لسګونو هېوادونو سره اړیکې نیولي او دا مهال په لوړه کچه تعاملات دوام لري.
قانون مند نظام او هغه ټولنه چې اصول او قوانین پکې پر ټولو په یو ډول تطبیق کېږي، د عدالت د تأمین لپاره لار هواروي، په همدې خاطر په اختریز پیغام کې د قوانینو او اصولو پر مراعت، تطبیق او مکلفیت هم ټینګار شوی دی.
په افغانستان کې د انکشافي پروژو او د هېواد د بیا رغونې، ابادۍ او فقر د مخنیوي په برخه کې اقدامات هم د اختریز پیغام مهمه برخه جوړوي؛ پر هېواد د سرپرست حکومت له حاکمیت راهیسې د بیا رغونې چارې په خورا چټکۍ روانې دي او هېواد د ځان بسیاینې په لور ګامونه اخلي.
په اسلامي ټولنو کې د منکراتو مخنیوی او د معروفاتو ترویج د ټولنیزو اصلاحاتو مهمه برخه او د اسلامي نظام لپاره مهم شرط بلل کېږي، په افغانستان کې امربالمعروف، نهي عن المنکر او شکایتونو ته د رسېدلو وزارت په دې برخه کې قاطع دریځ لري، د ټولنې د اصلاحاتو په برخه کې یې مهم ګامونه اوچت کړي دي، د حکومت مشرتابه هم د امربالمعروف او نهي عن المنکر پر دیني فریضه ټینګار کړی او د دغه ارګان له محتسبینو سره یې د همکارۍ غوښتنه کړې ده.
هېواد د لسیزو جګړو او اشغال پر مهال جګړو ځپلی، ګڼ شمېر خلک یې له امله فقیر، بې کاره او لا چاره شوي، د کونډو، یتیمانو او معیوبینو شمېر هم سلګونو زره ته رسېږي؛ په پیغام کې له شتمنو هېوادوالو څخه عامو لا چاره وګړو ته د صدقې او خیرات د ورکولو غوښتنه هم شوې ده.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
