وروسته له هغه چې د تش په نوم متحدې جبهې مشر، سمیع سادات افغانستان کې مېشت پخوانیو نظامیانو ته د وژل کېدو ګواښ وکړ؛ نو له دې موضوع سره هممهاله ګڼې پوښتنې او اندېښنې راولاړې شوې.
په داسې حال کې، چې واک ته د افغان حکومت له رسېدو سره سم عمومي عفوه اعلان شوه او ټولو پخوانیو نظامیانو په عادي ډول خپل ژوند پیل کړ؛ خو په یو شمېر سیمو کې ځینې پخواني نظامیان د شخصي دښمنیو تر نوم لاندې وژل شوي دي.
اوس اټکل دا دی، چې د سميع سادات له لوري پخوانيو نظاميانو ته د وژلو ګواښ، ښايي اوسنۍ د سټيج د سر خبره نه وي بلکې سادات په تېرو څو کلونو کې د پخوانيو نظامیانو د وژلو تر شاه لاس ولري.
دا شک هغه مهال لا پیاوړی کېږي چې سمیع سادات له یوې خوا پخوانیو نظامیانو ته د وژلو ګواښ کوي او له بلې خوا ادعا کوي چې په تېرو درېیو میاشتو کې ۱۸۴ پخواني نظاميان وژل شوي دي.
ياده دې وي، چې د سميع سادات وروستيو څرګندونو ته پخوانيو نظامیانو جدي غبرګون ښودلی او دا یې د دوی پر وړاندې د ښکاره دښمنۍ اعلان بللی.