د افغان انوېسټ شرکت مسئولینو د ریاست الوزراء له اقتصادي مرستیال ملا عبدالغني برادر سره په کتنه کې ویلي، چې د شبرغان–الوان دښتې ۵۰۰ کیلو ولټ مزي غځولو پروژې چارې ۸۵ سلنه بشپړې شوې دي.
د ریاست الوزراء اقتصادي معاونیت د خبرپاڼې له مخې، د لیدنې پرمهال د افغان انوېسټ شرکت مسؤلینو د دښت الوان سبسټېشن د پراختیايي چارو او همداراز د غور ولایت د تولک ولسوالۍ د سُرب او جستو کان د کاري پرمختګونو راپورونه شریک کړل.
د افغان انوېسټ شرکت مسؤلینو زیاته کړې، چې د غور ولایت د تولک ولسوالۍ د سُرب او جستو کان سروې بشپړه شوې او اوسمهال یې په ابتدايي ډول اکتشاف پيل کړی، چې له ۲۰۰ زیات هیوادوال پکې په کار بوخت دي.
د دوی په وينا، په هېواد کې دننه د دغه کان د پروسس په موخه د معیاري فابریکې ډیزاین یې هم پيل کړی، چې له بشپړېدو وروسته به د فابریکې د جوړولو چارې پيل کړي.
د ناستې په پای کې د ریاست الوزراء اقتصادي مرستیال د یاد شرکت په ترسره شويو کارونو خوښي څرګنده کړې او د ستونزو د حل ډاډ یې ورکړی دی.