یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
طالبانو په خپل درې کلنې واکمنۍ کې له لویو ننګونو راتېر شول او را تېریږي؛ دا درې کلونه یې په زغم، صبر، یو بل منلو، انعطاف او… کې تېر شو.
په چکپواینټونو د عادي عسکر له برخورد څخه واخله بیا د وزیرانو تر بې تشریفاتو ژوند پورې ټول په ولسي رنګ باندې رنګ حکومتداري یې تمثیل کړه؛ او په دې سربېره یې لویو عایداتي او زیربنايي پروژو ته ګوتې ور وړې، ښه بېلګه یې د اوبو د مهار ارماني پروژې دي؛ طالبانو د افغانستان د نیمي پېړۍ په کاغذ پاتې ارمانونو باندې کار پیل کړ.
طالبانو د قوشتیپي طلایي کانال سیاسي او ننګونکي پروژې ته لاس وغځاوه؛ د افغانستان لویې پروژې سیاسي او جنجالي دي، هیڅ نظام د مصلحتونو له مخې او د ګاونډیو د خفګان له امله یادو پروژو ته ګوتې نه وروړلې، مګر طالبانو بیا د خپل وطن مصلحت تر نورو محترم او مقدم وګاڼه.
د منځني اسیا هیوادونو د قوشتیپي په کانال سخت بد غبرګونونه وښودل او دوی خپل نیابتي ډلې هم استعمال کړې مګر پایله یې منفي وه، نه د رشید دوستم ګواښونه ځای ونیوه، نه هم د معلم عطانور ګواښونو نتیجه ورکړه، نه هم د اسمعیل خان د جنګیالو د انسجام پروژه کامیابه شوه، نه هم احمد مسعود رواني جنګ میدان وګاټه؛ دا ټولې نیابتي ډلې د قوشتيپي په وړاندې عاجز پاتې شول.
د شر ډلې رسنیز جنګ پیل کړ او تور یې پورې کړ چې طالبانو پاکستاني اتباع د قوشتیپي شاوخوا ځای په ځای کړي او د شمال د نا امنۍ لپاره ستراتیژیک پلان عملي کوي، خو افغانانو د شر ډلې په وړاندې د خپل د ارماني پروژې تر شا و درېدل.
همدا ډول د شر او فساد ډلې خال خال بغاوتونه پیل کړل ترڅو خپل فزیکي حضور ثابت کړي، مګر د امنیتي او کشفي ادارو اقدامات دومره تېز او چټک وو چې دوی د تېښتې فرصت ونه مونده.
د شر او فساد لارویان په اندرابونو کې مات شول، د پنجشیر په ناوونو کې هم پټ پاتې نه شول د بدخشان د هندوکش لوړو څنډو هم د شر او ضرر ډلې ته پناه ور نه کړه؛ څه کولاب ته په ژوند ورک شول او څه په مرګ ورک شول.
یو نیم یې د داعشانو جامې واغوستې او خپلې بارجامې یې تغیر کړې، غوښتل یې چې خپل شرارت ته مذهبي رنګ ورکړي، مګر د طالبانو په وړاندې یې پښې ورېږدېدې او د افغانستان د تباهۍ ارمانونه یې ګور ته یووړل.
طالبانو په ټول قوت قوشتیپه جوړه کړه، سالنګونه یې ورغول، د کابل د انکشاف لپاره په تراټ په مخ روان دي، د کونړ په سیند پنځه بندونه به د چین هیواد په کومک ورغېږي، د لغمان د شاهي کانال د رغېدو چارې عملاً پیل شوې.
همدارنګه ترکمنستان تعامل ته رانږدې شو، روسیې خو له پخوا سفارت طالبانو ته سپارلی وو، ترکیې د شر ډله و شړله ان تاجکستان چې د شرارت ډلې خپل وروستۍ مورچل ګاڼه د دوی ټغر له هغه ځایه ور ټول کړ؛ د انګلستان د بهرنیو چارو وزیر تېره ورځ وویل چې چاته به اجازه ور نه کړو چې د افغانستان خلاف سیاسي غونډې او فعالیتونه وکړي.
د افغانستان سیاست، تجارت او اقتصادي وضیعت نام خدا په کش کې روان دی؛ د اټوم لرونکي پاکستان کرنسۍ، د ایران چې نظامي قوت په منطقه کې لري، پیسې یې د افغانیو په وړاندې د سیالۍ څه چې د مقایسې وړ نه دي.
د هندوستان کالداره چې دا به هیواد په ۲۰۳۰ کال کې په اقتصادي قوت بدلیږي او له افغانستان سره په سیالۍ کې ده.
د شر او فساد د لارویانو چې په کومو هیوادونو تکیه ده هغوی کرار کرار ترې لرې کېږي او دا ډله درګرده په شا غورځي او افغانستان د خدای جل جلاله په تکیه او توکل را پورته کیږي ان شاءالله.
