د طالبانو حکومت په لمانځه، ښو اخلاقو، حجاب او مشروع کاروبار امر کوي او له بداخلاقۍ، بې سترۍ، قمار، سود او نورو ناروا اعمالو خلک منعه کوي؛ ماشومان او ځوانان له دین او دیانت سره مینې او ښو اخلاقو ته دعوت کېږي.
ځوانان د شرعي احکامو او سوچه اسلامي کلتور د عملي کولو او ځلولو په برخه کې سیالۍ کوي؛ تقوا، غیرت، پاک لمني او افغاني لباس د کرامت سمبول دی.
د طالبانو حکومت هڅه کوي چې نارینه او ښځو ته د اسلامي شریعت په چوکاټ کې ټول حقوق ورکړي او همدا حقوق په خپله حکومتولۍ کې مراعات کړي.
د ماشومانو له حقونو نیولې بیا د بې وسه کسانو تر هغو پورې په پام کې نیول شوي دي، چې ښه بېلګه یې هغه معذوره کسان دي چې د کار کولو توان يې نه درلوده او له بيت المال څخه د دوی د اړتیا په نظر کې نیولو په اساس حصه ور کوي.
د دې برخلاف په پرځېدلي جمهوري حکومت کې بد اخلاقۍ او بربنډتوب ته ځانګړې کمپاینونه کېدل چې له امله یې بد اخلاقي او لنډغرتوب یو دود او کلتور ګرځېدلی ؤ.
د جمهوریت په دوران کې په لویو ښارونو کې د بای فرینډ او ګرل فریڼد نندارې کلتور عامولو په پار منظم کار روان ؤ، تر څو په افغاني ټولنه کې د اروپا او غرب لوېدلي اخلاق او کلتور رایج کړي او د افغانانو اسلامي او افغاني ننګ او حیاء له منځه یوسي.
همداراز په جمهوریت کې تر دې پورې خبره رسېدلې وه چې په کابل پوهنتون او د کابل په امریکایي پوهنتون کې همجنس بازانو ته استاذي رسېدلې وه او د خپل دې ذلیل فکر لپاره یې منظم کمپاین د محصلینو په منځ کې چلاوه؛ تعلیمې ادارو او سرکاري دفترونو کې د زده کړې او کمال پر ځای د موډ او فیشن سیالۍ موجونه وهل.
د جمهوریت په عسکري او ملکي ادارو او ارګانونو کې اخلاقي فساد په اوج کې وو، تر دې پورې چې د ارګ داخل کې ورته منظم کار کېده او د دوی خپلې رسنۍ ورباندې وغږېدلې.
په یوه لېسه کې په ماشومانو باندې د جنسي تېري پنځه نیم سوه پېښې د افغانستان په تاریخ کې یوه بده پېښه او فاجعه وه، چې افشاء کوونکې خبریال بیا د ملي امنیت له لوري د دې خبر د خپرولو له امله ونیول شو.
په تلويزيونو کې د بې حجابي خپرولو او د بد اخلاقي رامنځته کولو په خاطر ډول ډول برنامې جوړېدلې، د نر او ښځې پېژندل پکې ګران شول، نر او ښځې ته په يوه سترګه کتل کېدل، کوم اخلاق چې اسلام کې ورته ور کړل شوي وو هغه نه رعايت کېدل.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
