د عوامي نشنل ګوند مشر اېمل ولي خان د سعودي عربستان، ترکیې او پاکستان ترمنځ د «مکې ګډ دفاعي تړون» پر لاسلیک نیوکه کړې او ویلي یې دي، چې پاکستان په خپله د پراخې ناامنۍ له ستونزې سره مخ دی.
نوموړي ویلي، په پاکستان کې هره ورځ چاودنې کېږي، خلک وژل کېږي او د تحریک طالبان پاکستان فعالیتونو د دغه هېواد امنیتي وضعیت ننګولی دی.
اېمل ولي خان ادعا کړې، چې د پاکستان په ۷۵ سلنه برخه کې حکومتولي نشته او پوښتنه یې کړې، چې د دفاع او کورنیو چارو وزیران، لومړی وزیر او د پوځ مشر د دغو ستونزو د حل لپاره چېرته دي.
هغه د پاکستان حکومت ته په خطاب کې ویلي: «لومړی خپل کور سم کړئ؛ د کور دېوالونه نړېږي او بنسټونه یې خوځېږي.»