د رياست الوزراء اقتصادي معاونيت خبر ورکړی، چې د متحده عربي اماراتو HHM Global Industry Group شرکت په افغانستان کې د سالنګ دویم تونل او د درملو د تولیدي فابریکې په جوړولو کې د پانګونې لېوالتیا ښودلې ده.
د خبرپاڼې پر بنسټ، د اقتصادي معاونيت تر چتر لاندې د پانګونې بینالوزارتي کمېټې په نوبتي غونډه کې د دغه اماراتي شرکت د پانګونې موضوع څېړل شوې.
کمېټې په افغانستان کې د یاد شرکت د پانګونې هرکلی کړی او ویلي یې دي چې اړوند وزارتونه او ادارې به په دې برخه کې له شرکت سره بشپړه همکاري وکړي.
په غونډه کې له شرکت څخه غوښتنه شوې چې د سالنګ دویم تونل، د درملو د تولیدي فابریکې او نورو برخو کې د پانګونې لپاره خپلې طرحې چمتو او د ارزونې او بحث لپاره یې د پانګونې بینالوزارتي کمېټې ته وړاندې کړي.
ياده دې وي، چې تر دې وړاندې د سعودي عربستان دلتا نړيوال شرکت هم د افغانستان د نفتو برخه کې د ۲۰۰ ميليونه ډالرو پانګونې هوکړه لاسليک کړه.