وحیدالدین حیدر
د ریاست الوزرا سیاسي مرستیال مولوي عبدالکبیر ختیزو ولایتو ته د سفر په لړ کې د دلوې میاشتې په ٢٤ نیمه نیټه د لغمان د چارواکو او ولسونو سره وکتل، نوموړي یوې ولسي غونډې ته د وینا پر مهال ځینې څرګندونې لرلې چې ویناو کې یې د افغانستان د اوږدمهالې ستراتیژۍ او د حکومتدارۍ د استحکام امیدونه پراته ول، مولوي کبیر وویل؛ موږ له نړۍ سره سیاسي مقاطعه نه ده کړې او نه هم افغانستان په سیاسي انزوا کې واقع دی. تېر کال د امریکې ولسمشر جوبایډن نه د افغانستان د برخلیک په تړاو یو خبریال پوښتنه وکړه، بایډن وویل نن یو خوشحاله ورځ ده دا راباندې مه په غم کوﺉ، د افغانستان پوښتنې داسې دي لکه سړی چې زخم کې ګوتې وهي، افغانستان خدای هېره کړې جغرافیه ده.دا خو حتمي ده، سړی چې وهل وخوري هغه ځای به ورته غموونکی ځای وي د هغه ځای نوم اخیستو باندې یې ان حلق تریخیږي.خو د بایډن دا خبرې ځینو فراري فاسدینو ډنډوره کړې او تبلیغاتي سوژه یې ځنې جوړه کړه، همدا ډول ځینو مزدورو رسنیو ته د خبرونو د سُرخۍ موضوع په لاس ورغله. د افغانستان سیاسي مخالفینو او فراریانو څڼې اچولې چې امریکا له افغانستانه مخ واړوه ممکن افغانستان کې فعلي حاکمیت چپه شي. خو د مولوي کبیر څرګندونو د دوی په دې خام امید هم خاورې واړولې.ده زیاته کړه چې چین کې د افغانستان استازي باور لیک ومنل شو، کابو ډېرو هیوادونو کې د افغانستان د سیاسي نماینده ګیو مدیریت موږ ته سپارل شوی، موږ هم نړۍ سره په همکاریو اخته یوو، هم د ولس لپاره د اقتصادي رفاه لپاره شپه ورځ کار کوو، هم د تېرې ادارې پورونه خلاصو، هم نیمه کاره پروژې بشپړوو او هم په لویو پروژو باندې کار روان دی، د وطن بچي په تعلیمي، تحصیلي او ورزشي ډګرونو کې ځلیږي او موږ ورته په فُرصتونو برابرولو کې شپه او ورځ په ځان یوه کړې.د ریاست الوزرا د مرستیال دا خبره فراري چارواکو ته مرګ دی چې ویل یې موږ د دوی پورونه لنډوو.د 50 هیوادونو د پېسو په ژرنده ناست فراریانو شړیدلې ادارې او پوروړی افغانستان امارت ته په میراث پرېښوده.خو طالبانو د خدای په نصرت او د ولس په دعا افغانستان له سیاسي رکود او اقتصادي تورم نه را وباسه او لاهم د ملت د اسایش لپاره په بنسټیزو ارماني او لویو عایداتي بنسټونو جوړولو اخته دي چې افغانستان د تل لپاره له نیستۍ او ګداګرۍ را وباسي.خو بیا هم هغه فاسدې حلقې یې پښو ته تیږې ور تولوي او د ابادۍ د جهاد د یون مخه ډبوي. په دې ترتیب غواړي چې دا اداره بې کفایته او بې ظرفیته وښيي ترڅو خپلې بې کفایتي، فساد او بې ظرفیتي په کې پټه کړي.خو د دې کاروان مخه نیول ځکه ناممکن دي چې د خلکو زور د خدای زور وي، یعنې خدای تعالی اتحاد او اتفاق کې هغه لوی قوت ایښی چې د باطلو دسیسې نه دا یو ملت ماتولی شي او نه یې هم سیاستونه جرحه کولی شي.افغانستان بشپړ اسلامي هیواد دی چې اوس بشپړ اسلامي نظام په کې خدای تعالی حاکم کړی، په دې منځ کې غربي ټرمینالوژي او شرقي الحادي مفکورې نه ځایږي.دلته یوازې او یوازې اسلامي عقایدو باندې استوار نظامونه ژوندي پاتې کیدلی شي، د نورو عقایدو حاکمیتونه به لکه د شګو د کمرونو په څېر شړیږي، دوړيږي او نړيږي. پای
