د ننګرهار ولايت د رسنیو دفتر خبر ورکړی چې د یاد ولایت په دره نور ولسوالۍ کې د ولسوالۍ مسئولينو او قومي مخورو په هڅو د دوو کورنیو ترمنځ لس کلنه دښمني په دوستۍ بدله شوې.
د سرچینې د معلوماتو له مخې یاده دښمني د ملک شاه سيد او ملک شاهين کورنيو ترمنځ د ماشومانو پر سر لس کاله وړاندې رامنځته شوې وه، چې له امله يې له دواړو کورنيو څخه درې تنو ژوند له لاسه ورکړی وو او يو کور په کې هم تخریب شوی وو.
د یادونې وړ ده چې څو ورځې وړاندې د ننګرهار ولایت په مومندرې ولسوالۍ کې هم د دوو قومونو ترمنځ ۲۵ کلنه دښمني په دوستۍ بدله شوې وه.
