رسنیو راپورونه خپاره کړي، چې د هایټي هېواد په ملي زندان کې د پولیسو او وسله والو جنایي ډلو تر منځ د جګړې وروسته زرګونه بندیان تښتېدلي دي.
د یاد هېواد خبریالان، چې د مارچ درېیمه په پلازمینه “پورټوپرېنس” کې دې زندان ته ورغلي وایي، چې په زندان کې دننه او د باندې یې مړي لېدلي دي.
د مالوماتو له مخې هایټي په نړۍ کې یو له محرمو او کمزورو هېوادونو له جملې څخه شمېرل کېږي، چې د امریکا په لویه وچه کې موقعیت لري، دغه هېواد د جنایي ډلو او مجرمینو په درلودلو سره یو له خطرناکو هېوادونو څخه دی.
ویل کیږي، چې د یاد هېواد د پلازمینې ۸۰ سلنه خاوره کې جنایي ډلې غیر قانوني کړنې ترسره کوي.
یو انجینر د نوم نه ښودلو په شرط رسنیو ته ویلي، چې د ملي پولیسو سره په ګډه کار کوي، تر څو په زندان کې د مړو شویو او ټپي شویو کسانو په هکله مالومات راټول کړي.
دې انجینر وویل، چې د ملي پولیسو او جنایي ډلو تر منځ د جګړې نه وړاندې په زندان کې نږدې ۴۰۰۰ بندیان و او د یکشنبې په سهار پکې یوازې ۹۹ تنه پاتې وو.تر اوسه نده مالومه، چې څومره بندیان په جګړې کې وژل شوي او څومره یې تښتېدلي دي.
عیني شاهدان وایي، چې یو شمېر عام خلک هم د زندان څخه د باندې د پولیسو او جنایي ډلو تر منځ په ډزو کې وژل شوي، خو شمېر یې معلوم نه دی. مسؤلینو ویلي، چې په دې پیښه کې د وژل شویو او ټپي شویو کسانو په اړه به مالومات وروسته خپاره کړي.
یو شمېر عام خلک د زندان څخه د باندې د پولیسو او جنایي ډلو تر منځ په ډزو کې وژل شوي.راپورونه وایي، چې په دغه زندان کې یو شمېر مهم کسان هم بندیان وو، چې د پارلمان د پخواني مشر چالرز چانسي او د دې هېواد د پخواني جمهور رئیس “جوویل مویس” د ترور په قضیې کې یو مهم مشکوک شخص جوسیف فیلیکس او د کلیفورډ برانډیټ په نامه د مخدره موادو محکوم شوی کاروباري، چې د هایټي یو تر ټولو شتمن شخص دی، هم بندیان وو.
دې انجینر ویلي، چې برانډیټ په زندان کې د جګړې له پیل کېدو څخه وړاندې بل ځای ته لېږدول شوی و.
یوه ویډیو، چې په ټولنیزو شبکو کې خپره شوې په کې ښودل کیږي، چې برانډیټ پداسې حال کې له زندان څخه اېستل کیږي، چې په وسلو سمبال پولیس ورسره دي.
مسؤلینو همدارنګه ویلي، د کولمبیا ۱۸ پخواني سرتېري، چې د هایټي د پخواني جمهور رئیس د ترور په قضیې کې تورن دي، له زندان څخه نه دي تښتېدلي.
د هایټي لومړی وزیر آریل هینري اوس مهال له هېواده بهر دی، نوموړی تېره اوونۍ کینیا ته تللی.
هلته یې دوه اړخیز امنیتي تړون لاسلیک کړ، چې له مخې به یې د کینیا ۱۰۰۰ پولیس په هایټي کې په ګڼ ملتیز امنیتي ځواک کې ماموریت ترسره کړي.
ملګرو ملتونو د دې ځواک جوړیدو ته اجازه ورکړې، چې په دې هېواد کې د جنایي ډلو سره مقابله وکړي او امنیتي فضا را منځ ته کړي.