د هوایي ځواک پوهنتون څخه درې تنه مجاهد پيلوټان فارغ شول

ملي دفاع وزارت خبر ورکوي چې په لومړي ځل د ياد وزارت اړوند د هوایي ځواک او هوایي مدافعې پوهنتون څخه درې تنه مجاهد پیلوټان له مسلکي، نظري او عملي زده کړو څخه وروسته نن فارغ او خپل عملي پروازونه یې په بریالیتوب سره ترسره کړل.

د ملي دفاع وزارت څخه خپره شوې خبرپاڼه کې راغلي چې د درې تنو مجاهدو پيلوټانو له فرغاست سربېره د هوایي ځواک او مدافعه هوایي پوهنتون چې د ملي دفاع وزارت رهبرۍ په هڅو پیل شوی نن ۱۲۰ تنه ځوانان د څلور کلنو پیلوټي زده کړو لپاره جذب کړل چې له ډلې یې ۸۰ تنه پیلوټان، ۲۵تنه انجینر پیلوټان او ۱۵ کشاپ پروازي پیلوټان شامل وو، او درسونه یې رسماً پیل شول.

خبرپاڼه زياتوي چې په همدې مناسبت جوړو شويو مراسمو ته د کورنیو چارو وزارت وزیر خلیفه سراج الدين حقاني په خپلو خبرو کې وویل: الحمدلله زموږ هوایي ځواک ورځ په ورځ پخپلو چارو کې خپلواک کېږي، تاسو کوشش وکړئ خپلې زده کړې په صحیح ډول وکړئ، هېڅکله مه بې حوصلې کېږئ، خپلو هیوادوالو ته لاس ورکړئ او متحد شئ او کوم پیلوټان وروڼه چې بهر ملکونو ته تللي، هغوی ته زموږ غېږه خلاصه ده دوی کولای شي چې خپل هیواد ته راشي او هیوادوالو ته خدمت وکړي.

خبرپاڼه زياتوي چې د وسلوال پوځ لوی درستيز قاري فصیح الدین “فطرت” یادو پیلوټانو ته په خبرو کې وویل: په تېرو شلو کلونو کې د ځینو افغانانو اشتبهات د افغانستان د اشغال سبب وو، خو د اسلامي امارت زعیم هغوی ته عفوه وکړه، نن ورځ زموږ هر هیوادوال کولای شي چې دلته خدمت وکړي او هیواد په خپلو پښو ودروي، زموږ ملي اسلامي اردو په واقعي توګه د هیواد ساتونکي دي، موږ پرځان ستړیا راولو ترڅو هیوادوالو مو په آرامه ژوند وکړي.