برېښنا شرکت د يوې خبرپاڼې په خپرولو سره ويلي چې نن د بلخ ولایت په دهدادي ولسوالۍ کې د ۲۸میلیونه ډالرو په لګښت د لمريزې برېښنا د تولید د یوې پروژې چارې پیل شوې.
د برېښنا شرکت اجرايوي رئيس ډاکټر عبدالباري عمر نن د دغې لمریزې برېښنا د تولید شبکې د چارو پرانیستې مراسمو کې وویل، یاده شبکه چې په ۵۰۰ جریبه ځمکه کې جوړیږي، ۴۰ میګاواټه برېښنا تولیدوي او چارې به یې راتلونکو دوو کلونو کې بشپړې شي.
نوموړي زياته کړې چې د یادې پروژې په بشپړېدو سره به زرګونه کورنۍ او صنعتي فابریکې په اسانه ډول برېښنا ته لاسرسی پیدا کړي.
د یادې پروژې چارې د غضنفر ګروپ او ذولرستان خصوصي شرکتونو له لوري ترسره کیږي.