د اتریش په پلازمېنه ویانا کې د روانې فبرورۍ په ۱۸مه او ۱۹مه د سرپرست حکومت څو مخالفې ډلې سره راټولې شوې، دوې ورځې یې د پردو تر شا او د تمویلوونکو او نورو بهرنیو اړخونو د اغېزې، فرمایشونو او غوښتنو تر سیوري لاندې وېشلې پاشلې خبرې سره وکړې او په پایله کې یې یوه مجمله او مبهمه اعلامیه خپره کړه، چې وروسته بیا دې ناستې ان د نورو مخالفو جهتونو پراخ غبرګونونه هم راوپارول.
که څه هم دې ناستې ته تابیا داسې نیول شوې وه، چې ټولې او یا لږ تر لږه بهرمېشتې اکثریت مخالفې ډلې به پکې ګډون کوي، خو داسې ونه شول او دا ناسته د بندو دروازو تر شا، ان د څو محدودو کسانو د اختلاف په اوج او د مجبوریت په فضا کې ترسره شوه. د غونډې جزئیات هم له رسنیو سره شریک نه شول او یواځې پر هماغې یوې مبهمې اعلامیې اکتفا وشوه.
خو تازه له هندوکشغږ سره د دې ناستې له منځه یوې باخبره او باوري سرچینې د دې غونډې په اړه کره او دقیق جزئیات شریک کړل. د موضوع د حساسیت په خاطر دا سرچینه له نوم اخیستو ډډه کوي، خو په خبره یې دا ناسته په داسې فضا کې ترسره شوه، چې ټولې چارې او صلاحیتونه یې پر بهرنیانو سربېره، یواځې احمد مسعود او یاسین ضیاء انحصار کړي وو. دوی دواړو هم په لومړي سر کې د بیرغ پرسر شدید اختلاف درلود، د احمدشاه مسعود زوی، احمد مسعود په دې غونډه کې د نظار شورا د بیرغ پر اېښودو ټينګار کاوه، خو یاسین ضیاء بیا پر دې تاکید کاوه، چې باید د غونډې په تالار کې درې رنګه بیرغ کېښودل شي. په دې اړوند تر پراخو ناندریو وروسته، بالاخره احمد مسعود د یاسین ضیا دې غوښتنې ته تسلیم شو او په تالار کې یې د درې رنګه بیرغ (تور، سور، زرغون) له اېښودو سره موافقه وکړه، چې دې چارې د احمد مسعود او مقاومت جبهې د غړو او پلویانو سخته غوسه راوپاروله او نوموړی یې پر معاملې تورن کړ.
د سرچینې په وینا، ټاکل شوې وه چې دې غونډې ته د هزارهګانو په استازولۍ محقق او یا هم د ده کوم بل نږدې او لوړپوړی استازی ورشي، خو د نامعلومو دلایلو له امله په ۹۰مه دقیقه کې دوی ته ویزه ورنه کړل شوه چې په دې غونډه کې ګډون وکړي.
سرچینه زیاتوي، په دې غونډه کې د ازبکانو د استازي په اړه هم نظرونه مختلف وو، چا ویل چې دوستم او یا د جنبش ګوند کوم بل لوړپوړی استازی به ګډون کوي او ځينو نورو بیا په دې اړه اختلاف درلود او د نورو کسانو د ګډون غوښتنه یې درلوده، چې بالاخره په دې غونډه کې د دوی ګډون هم ډېر کمرنګی و.
سرچینه همداراز زیاتوي، هڅه دا وه چې دا ناسته متنوع وښودل شي، بېلابېل اړخونه ورته راټول شي، خو ځینو څهرو د غونډې د اجنډا او بېلابېلو نورو مواردو پرسر د شدیدو اختلافونو له امله لا له وړاندې دا غونډه تحریم کړه او د ځینو نورو څهرو او جهتونو د ګډون مخه په لوی لاس ونیول شوه، ځکه هر چا هڅه کوله چې په دې غونډه کې هم د ځان په نوم امتیاز ګیري وکړي او خپل ځان پکې مطرح اړخ وښيي.
له همدې امله دا سرچینه زیاتوي، چې پر پراخو کمپاینونو او تبلیغاتو سربېره، دا ناسته د شدیدو ټکرونو، اختلافاتو، بې باوریو او د نورو د بهرنیو اړخونو د اغېزو، فرمایشونو او غوښتنو په سیوري کې ترسره شوه او کومه ملموسه پایله یې نه درلوده.