د یمن انصارالله (حوثي) ډلې خبر ورکړی، چې د سره سمندر، عربي سمندر، باب المندب او عدن خلیج له لارې یې د اسرائیلي کښتیو تګ راتګ بند کړی.
د حوثي ځواکونو ویاند یحیی سریع ویلي چې، دا پرېکړه د فلسطین مظلوم ولس او د حماس مبارزينو د ملاتړ لپاره شوې، ځکه چې صهيونيستي اسرائیل د غزې بندرونو پرانیستلو او بشري مرستو ته د داخلېدو اجازه نه ده ورکړې.
سریع زیاته کړې، چې دا بندیز له اعلان سره سم نافذ دی او که کومه اسرائیلي کښتۍ دا بندیز مات کړي، نو د برید هدف به وګرځي.
حوثي ډلې ټینګار کړی چې بندیز به تر هغو دوام وکړي، څو چې د غزې لارې پرانیستل شي او خوراکي توکي او درمل دننه پرېښودل شي.