د پاکستاني طالبانو غورځنګ په ملګرو ملتونو کې د دغه هېواد د دایمي استازي، وروستیو څرګندونو ته چې ګواکې د یاد غورځنګ جنګیالي له افغانستان څخه پاکستان ته اوړي، په کلکه رد کړي.
د یاد غورځنګ ویاند محمد خراساني په یوه اعلامیه کې ویلي، چې د پاکستاني استازي دغه څرګندونې د پوځي او سیاسي مرستو د جلب او د پاکستاني ولس له منځه د راپورته شوي مقاومت په وړاندې د خپلې کمزورۍ د پټولو څرګنده بېلګه ده.
ښاغلي خراساني وړاندې ویلي، چې پاکستان تر دې وړاندې هم په ورته ادعاوو او بې بنسټه تورنو له نړیوالو پوځي او سیاسي ملاتړ ترلاسه کړی.
«پاکستاني ریاست امریکایانو ته د سیمهییز ثبات او امنیت د ټینګښت او ورته نورو درواغجنو وعدو په ورکولو د هغوی مالي مرسته جلب کړه، چې په توسط یې پر دوه زره ۷۰۰ کيلومتره اوږده ډیورنډ فرضي کرښه ۱۲ فوټه لوړ او پنځه فوټه پلن قوي اغزن تار درولی دی.»
د پاکستاني طالبانو غورځنګ ویاند وړاندې ټینګار کړی، چې ځواکونه یې له ګلګت څخه تر بلوچستانه او له «هزاره» څخه تر پنجاب او کراچۍ پورې منظم پوځي تشکیلات لري، چې د زرګونه جنګیالیو تړاو یې له اړونده سیمو سره دی.
یاد غورځنګ له ملګرو ملتونو او ښکېلو لوریو غوښتي، چې د واقعیتونو د تثبیت په موخه د یوه بې طرفه مسلکي پلاوي پر مټ په ملګرو ملتونو کې د پاکستان د استازي ادعاوې په بې طرفه او مسلکي ډول وڅېړي.
د پاکستاني طالبانو غورځنګ ویاند محمد خراساني د اعلامیې په پای کې ټینګار کړی، چې روانه مبارزه یې د پاکستاني حکومت د بېعدالتیو په پایله کې رامنځته شوې او د دغې مبارزې لپاره دوی د افغانستان په ګډون د هیڅ هېواد خاورې ته اړتیا نهلري.