د پاکستان د جمعیت علماء اسلام ګوند مشر، مولانا فضل الرحمن اسلام اباد کې وروستۍ چاودنې ته په غبرګون کې ویلي، چې د دغه هېواد هېڅ برخه د «ترهګرۍ» له ګواښ څخه خوندي نه ده.
نوموړي ویلي، په داسې حالاتو کې د امنیتي ادارو لهخوا پر خپلې کارکردګۍ ویاړ کول د پوښتنې او نیوکې وړ دي.
مولانا فضلالرحمن زیاته کړې، سره له دې چې په پاکستان کې لسګونه استخباراتي ادارې فعالیت لري، خو بیا هم د اسلاماباد په څېر ښار کې د عامو وګړو ژوند خوندي نه دی، چې دا د پاکستاني ادارو ښکاره ناکامي څرګندوي.
د هغه په وینا، د پاکستان اوسنی حاکم رژیم د «ترهګرۍ» پر وړاندې د جدي او اغېزمنې مبارزې پر ځای، په سیاسي چارو کې په لاسوهنو بوخت دی.
نوموړي همداراز ویلي، چې یاد رژیم له هرې پېښې وروسته یوازې د غندنې پر بیانونو بسنه کوي او هڅه کوي د همدې تشو څرګندونو له لارې ولس قانع کړي.