د بهرنیو چارو وزارت د عامه اړیکو رئیس، حافظ ضیاء احمد تکل وایي، د دغه وزارت او د روسیې د بهرنیو چارو وزارت ترمنځ د رئیسانو په کچه د سیاسي مشورو دویمه ناسته په کابل کې ترسره شوه.
نوموړی زیاتوي، چې دې ناسته کې افغان پلاوي مشري د بهرنیو چارو وزارت د درېیم سیاسي رئیس، دکتور عبدالحی قانت، او د روسیې د پلاوي مشري د دغه هېواد د بهرنیو چارو وزارت د آسیا د دویمې ادارې رئیس، آلکسي پاولوفسکي، پر غاړه درلوده.
د ښاغلي تکل په وینا، په دې غونډه کې دواړو لوریو د افغانستان او روسیې د دوه اړخیزو اړیکو د لا پراختیا پر لارو چارو، د سیمې او نړۍ پر وروستیو سیاسي تحولاتو، د سیمهییز ثبات او امنیت، او نورو ګډو ګټو پورې اړوندو موضوعاتو خبرې کړي دي.
دواړو لوریو د اقتصادي همکاریو د پراختیا، د سوداګرۍ د کچې د لوړولو، د پانګونې د فرصتونو د رامنځته کولو او د ټرانسپورټي او ټرانزیټي دهلېزونو د فعالولو په برخه کې د عملي همکاریو پر پراختیا هم ټینګار کړی دی.
د بهرنیو چارو وزارت د عامه اړیکو رئیس په خبره د دغې لړۍ دریمه غونډه به د دواړو لوریو په توافق په مسکو کې ترسره شي.