کورنيو چارو وزارت د خپلو معلوماتو له مخې وايي، چې د بېګانۍ زلزلې له امله په کونړ ولايت کې ٦۱۰ تنه شهيدان شوي، ۱۳۰۰ تنه ټپيان او ګڼ شمېر کورونه ویجاړ شوي دي.
ياد وزارت زياتوي، چې په ننګرهار ولايت کې بيا ۱۲ تنه شهيدان، ۲۵۵ تنه ټپيان شوي او په لسګونو کورونه هم تخريب شوي دي.
سرچينه وايي، د کورنيو چارو وزير خليفه سراج الدين حقاني د اړونده ولايتونو ټولو امنيتي او خدماتي مسؤلينو ته سپارښتنه کړې، چې ژر تر ژره د پېښو سیمو ته ځانونه ورسوي او کوټلي ګامونه واخلي.
دغه وزارت همدا راز ډاډ ورکړی، چې ټولو امنيتي، خدماتي، صحي، ټرانسپورتي، غذايي او اړونده ټیمونو خپلو مرستو ته چټکوالی ورکړی، تر څو زيانمنو شويو هېوادوالو سره هر اړخيزه او پوره مرسته وشي.