د ملي دفاع وزارت وایي، چې د دې وزارت اړوند ۲۰۳ منصوري قول اردو له ښوونیز مرکز څخه ۴۰۰ تنه ځوان منسوبین له درې میاشتني پوځي او عقیدوي زده کړو څخه فارغ شول.
په دې اړه جوړو شویو مراسمو کې د یادې قول اردو قومندان مولوي عبدالقیوم روحاني، د ملي دفاع وزارت څخه تللي پلاوي او د قول اردو ګڼ شمېر نورو مسئولینو ګډون کړی و.
مسوولینو فارغانو ته په وینا کې ویلي: «تاسو نن په عقیدوي او مسلکي ډول روزل شوي یاست، د خپل هیواد له سرحداتو او ځمکنۍ بشپړتیا څخه به په پوره میړانه دفاع وکړئ.»
د یادونې ده، چې تر دې وړاندې د ۲۰۷ الفاروق قول اردو له ښوونیز مرکز څخه هم د یو لړ مراسمو په ترڅ کې ۷۰۰ ځوان سرتېري فارغ او د پوځ لیکو ته جذب شوي دي.