د افغانستان لپاره د امریکا پخواني ځانګړي استازي زلمي خلیلزاد پر خپله اېکس پاڼه پاکستان کې روانو نا امنیو ته په اشارې سره لیکلي، چې پاکستاني پوځ له ناکامۍ سره مخ دی او خپل هېواد یې د تباهۍ په لور روان کړی دی.
خليلزاد همدا راز اندېښنه ښودلې، چې د پاکستان هېواد له جدي ناورین سره مخ دی او که حکومت بدلون رامنځته نه کړي، نو له بدو پایلو سره به مخ شي.
نوموړي پاکستاني حکومت او پوځ ته خبرداری ورکړی، چې په هېواد کې یې د کړکېچ د مخنېوي لپاره ورسره وخت بېخي کم پاتې دی او باید سملاسي لاس په کار شي، که نه نو ډېر ژر به له بدو پايلو سره مخ شي.
دغه جګپوړي امريکايي ډيپلومات تر دې وړاندې هم پاکستاني حکومت ته خبرداری ورکړی وو، چې پاکستان کې د بشري حقونو روان نقض او زور زياتی پای ته ورسوي.