الجزیرې راپور ورکړی، چې د سعودي عربستان د کورنیو چارو وزارت او د پاسپورټونو عمومي ادارې د هغو بهرنیو کارګرانو لپاره د جریمې، بند او شړلو نوي سخت مقررات اعلان کړي، چې له قانوني چوکاټ پرته په خپل سر کار کوي.
د راپورونو له مخې، د لومړي ځل سرغړونې لپاره ۱۰ زره سعودي ریاله جریمه او له هېواده شړل، د دویم ځل لپاره ۲۵ زره ریاله جریمه، یوه میاشت بند او شړل او د درېیم ځل یا تکراري سرغړونې لپاره تر ۵۰ زره ریالو جریمه، شپږ میاشتې بند او له هېواده ایستل په پام کې نیول شوي دي.
سعودي چارواکو ویلي، یوازې سرغړونکی کارګر نه، بلکې هغه کسان او ادارې هم له قانوني مجازاتو سره مخ کېدای شي، چې د غیرقانوني کار زمینه برابروي، کارګر استخداموي، انتقالوي یا ورته استوګنځای برابروي.