د اېرلنډ، اسپانیا او ناروې څخه وروسته د سلوانیا لومړي وزیر “رابرت ګولوب” ویلي، چې فلسطین د یوه خپلواک هېواد په توګه په رسمیت پېژني.
یو شمېر نړۍوالو رسنیو د سلوانیا دولت له قوله خبر ورکړی او ویلي یې دي، چې د سلوانیا پارلمان په راتلونکو ورځو کې د فلسطین په رسمیت پېژندلو لپاره غونډه کوي.
د سلوانیا دغه اقدام ته صهیونیستي رژیم بیړنی غبرګون ښودلی دی.
د سلوانیا لومړي وزیر “رابرت ګولوب” دغه ګام د سولې له پیغامه ډک وباله او په غزه کې یې د اسرائیل او حماس ترمنځ د جګړو د ژر تر ژره درېدو او د یرغمل شویو د خلاصون غوښتنه وکړه.
دغه هېواد د فلسطین بېرغ د سلوانیا او اروپایي ټولنې د بېرغ ترڅنګ د سلوانیا په پلازمېنه “لیوبلیانا” کې د حکومت ودانۍ ته څېرمه وځړاوه.
بل لور ته یو شمېر رسنیو خبر ورکړی، چې “مالتا” ویلي، چې ډېر ژر به د فلسطین د رسمیت پېژندلو لپاره اقدام وکړي.