د سرحدونو، قومونو او قبایلو چارو وزارت له لوري په خپره شوې خبرپاڼه کې راغلي، چې د سمنګان ولایت په مرکز ایبک کې د دوو کورنیو ترمنځ هغه اوږدمهاله شخړه، چې د میراث په سر رامنځته شوې وه، د سیمهییزو مسؤلینو په منځګړیتوب پای ته ورسېده.
په خبرپاڼه کې راغلي، چې دغه اختلافات نږدې دوه کاله وړاندې پیل شوي وو او دواړه کورنۍ یې له جدي ستونزو سره مخ کړې وې.
د خبرپاڼې د معلوماتو له مخې، د سمنګان ولایت د سرحدونو، قومونو او قبایلو چارو امریت مسؤلینو د ځايي سپینږیرو او مخورو په همغږۍ له دواړو خواوو سره څو ځلې ناستې وکړې او په پای کې یې د یوې منصفانه پرېکړې له مخې د شخړې موضوع حل کړه.
له پرېکړې وروسته دواړو کورنیو د ورکړل شوي حق په منلو سره رضایت څرګند کړ او ژمنه یې وکړه چې له دې وروسته به د ورورولۍ او سولې ژوند ته دوام ورکوي.