د شهیدانو او معلولینو چارو وزارت مسئولینو، نن چهارشنبه د حکومت د اطلاعاتو او رسنیو مرکز کې د امارتي ادارو د یو کلنو لاسته راوړنو د تشریح پروګرام کې د یوه خبري کنفرانس پر مهال، د دغه وزارت د یوکلنو کړنو او لاسته راوړنو راپور له رسنیو سره، شریک کړ.
د شهیدانو او معلولینو چارو وزارت مسئولینو په دې خبري کنفرانس کې وویل: په تېر یوه کال کې ۶۱۲۰۸۸ کونډو، یتیمانو او معلولینو ته په ټولیز ډول، ۱۵ میلیارده ۴۰۷ میلیونه ۳۸۲ زره او ۷۰۸ افغانۍ میاشتني مساعدتونه ورکړل شوي او د خیریه موسسو لخوا له ۸۹۴۴۲ کونډو، یتیمانو او معلولینو سره د خوراکي او غیر خوراکي توکو مرسته شوې ده.
د وزارت مسئولینو زیاته کړه، چې په وروستي یوه کال کې له ۶۷ خیریه موسسو سره، د همکارۍ تفاهم لیکونه لاسلیک او د ۴ میلیونه او ۵۰۰ زره امریکایي ډالرو په ارزښت، اړمنو او مستحقو کسانو ته اړین خدمتونه وړاندې شوي دي.
د یاد وزارت د مسئولینو په وینا، تر دې دمه ۶۵۳۲۶۵ تنه کونډې، یتیمان او معلولین تثبیت، چې له دې جملې څخه ۲۶۴۳۳۵ په سیستم کې درج شوي دي.
دغه راز، په تېر کال کې د مستحقو کسانو د تثبیت په موخه، د تصفیې پروسه په لار اچول شوې وه، چې په پایله کې یې ۲۸۱۸۳ تنه کونډې، یتیمان او معلولین تر غیر مستحق پېژندل کېدو وروسته، له سیستم څخه حذف شوي دي.
د وزارت مسئولینو د خپلو خبرو په دوام وویل: په وروستي یوه کال کې ۹۹۰ تنه کونډې، یتیمان او معلولین د درملنې په موخه، روغتونونو او روغتیایي مرکزونو ته معرفي شوي او ۳۸۸۵ تنه نورو ته د مصنوعي غړو، فزیوتراپي، اورتوپیدي او روان درماني برخه کې اړین خدمتونه وړاندې شوي دي.
همدارنګه ۱۲۰ تنه معلولینو او یتیمانو د کمپیوټر، برېښنایي وسایلو ترمیم او خیاطۍ برخه کې حرفوي زده کړې کړي او تر فراغت وروسته اړین تجهیزات په واک کې ورکړل شوي دي.
د شهیدانو او معلولینو چارو وزارت د معلوماتو پر بنسټ، د کونډو، یتیمانو او معلولینو ثبتولو بهیر دوام، د نغدي او غیر نغدي مساعدتونو جلب او وېش، په میاشتني ډول د حقوقو ورکول، له خیریه موسسو سره د همکارۍ تفاهم لیکونو لاسلیکول، یتیمانو او معلولینو ته د حرفوي او مسلکي زده کړو ورکولو د پروګرام دوام، د افغانستان اسلامي امارت د رهبرۍ د احکامو او فرامینو تحقق او د خدمتونو وړاندې کول؛ په روان کال کې د وزارت له مهمو لومړیتوبونو څخه دي.
