فایننشيل ټايمز بريټانوۍ ورځپاڼې واک ته د ټرمپ له رسېدو راوروسته د امريکا او اروپايي اتحاديې تر منځ راولاړو شويو کړکېچونو ته په اشارې راپور ورکړی چې د اروپا له لوري په امريکا ړوند باور او په وروستيو کې د ټرمپ يو لړ اقدامات د دې لامل شوي چې اروپا او امريکا په يوه او بل باور وبايلي او دغه راز د ناټو د سقوط اندېښنې هم راولاړې شي.
سرچينې ليکلي چې د دې بې باوريو په لړ کې د اروپايي اتحادیې اجرائیه پلاوي یو نوی لارښود خپور کړی او له خپلو لوړپوړو چارواکو څخه یې چې په امریکا کې مېشت دي، غوښتي چې د دغه هېواد د سایبري جاسوسۍ پر وړاندې جدي او احتیاطي اقدامات وکړي.
په تېرو میاشتو کې، د امریکا د ولسمشر ډونالډ ټرمپ د حکومت اقداماتو لکه د ګرینلنډ د نیولو ګواښ، د اروپايي وارداتو پر سر تعرفې لګول، او د روسیې او اوکراین د جګړې د قضیې په حل کې د اروپايي اتحادیې له پامه غورځولو د اروپا او امريکا د څو لسیزو دیپلوماتیک نورمونه مات کړي، او اروپايي متحدین یې اندېښمن او بېباوره کړي دي.
د سرچينې په خبره د اروپا او امريکا مخ په خرابېدونکو اړيکو او د ټرمپ له لوري د ناټو د منحل کېدو په اړه ګواښونو د ناټو اتحاد د سقوط اندېښنې هم راپارولې دي.