د کانونو او پټروليم وزارت د وياند همايون افغان په خبره له کابو پنځلس کلن ځنډ وروسته به د مس عينک کان عملي چارې د روانې اونۍ په پای کې پيل شي.
ښاغلی افغان زياتوي قراردادي کمپنۍ مکلف کړل شوې چې د مسو د دې ستر کان عملي چارې او سل سلنه پروسس پيل کړي او د دې ترڅنګ به يادې کمپنۍ د ۲۰۰۸ ميلادي کال له شويو پرېکړو او تعهداتو سره سم بې له کوم خنډ او ځنډه د روانې اونۍ په پای کې د مسو د ياد ستر کان د کیندنې او پروسس چارې عملاً پيلوي.
د ياد کان د کیندنې او پروسس چارې له يوه چينايي شرکت (ام سي سي) سره لاسليک شوې دي چې له تېرو پنځلس کلونو یې د بېلابېلو دلايلو پر بنسټ د پروسس چارې په ټپه ولاړې وې خو په دې وروستيو کې د اسلامي امارت د بې سارو هڅو او کوښښونو په پايله کې یې دا دی عملي چارې پيل شوې.
د مس عینک کان د کابل سوېل لویدیځ په ۳۰کیلومترۍ کې د لوګر ولایت محمد اغې ولسوالۍ د عینک په سیمه کې موقعیت لري چې د سیمې په کچه د مسو ستر کان بلل کېږي او د افغانستان لپاره له خورا ستر اقتصادي ارزښت څخه برخمن دی د اقتصاد پوهانو په وينا د افغانستان لپاره د کاري فرصتونو ايجاد، د ملي عوايدو ډېرښت، يو شمېر نورې حياتي ګټې لري.