متقي: افغانستان د ملگرو ملتونو سازمان سره رغنده تعامل ته لېوالتیا لري

د افغانستان د بهرنیو چارو وزارت وايي، د ملگرو ملتونو ځانگړي همغږي کوونکي فریدون سینیرلي اوغلو او د افغانستان د بهرنیو چارو وزیر مولوي امیر خان متقي گډه ناسته کړې او د افغانستان په اوسنیو پرمختگونو یې ورسره خبرې کړې دي.
له یاد وزارت څخه په خپره شوې خبرپاڼه کې ویل شوي، په دغه ناسته کې پر وروستیو ډیپلوماټیکو پرمختگونو، د خپلواکې ارزونې وړاندیزونو او راتلونکې دوحې ناستې په اړه هر اړخیزې خبرې اترې وشوې.
د خبرپاڼې له مخې، د بهرنیو چارو وزیر په کابل کې «د افغانستان د سیمه‌ییزې همکارۍ ابتکار» د ناستې او په بېجینگ کې د افغانستان د سفیر د باورلیک منلو په تړاو معلومات وړاندې کړل او دا یې په ډیپلوماتیک ډګر کې د امارت لپاره هیله‌بښونکي پرمختگونه وگڼل.
په خبرپاڼه کې ویل شوي، امارت د ملگرو ملتونو سازمان سره رغنده تعامل ته لېوالتیا لري او د ملگرو ملتونو د امنیت شورا د ۲۷۲۱ پرېکړه‌لیک په تړاو یې د امارت دریځ تکرار کړ.:«د افغانستان اوسنی وضعیت او د یوناما په شتون کې د بل اضافي ځانگړي استازي گمارنې ته کوم موجه دلیل او اړتیا نه لیدل کېږي.»
په دغه ناسته کې د ملګرو ملتونو همغږي کوونکي سینیرلي اوغلو وویل، په کابل کې د تېرې اوونۍ«د افغانستان د سیمه‌ییزې همکارۍ ابتکار» ناسته یې له نږدې څارلې او په دې تړاو یې بهرنیو چارو وزارت ته مبارکي وویله. همدارنگه نوموړي وویل، د دوحې ناستې په موخه افغانستان سره د یوې دوامداره پروسې له لارې د نړیوالې ټولنې مسلسل تعامل دی.:«په کابل کې باید د نورو هېوادونو دیپلوماتیک حضور ډېر شي، د افغانستان پر مرکزي بانک د بندیزونو د لرې کولو په اړه خبرې وشي، افغانستان سره تخنیکي او پراختیايي مرستې هم شي. نړیوال بانک به په نږدې راتلونکي کې د افغانستان په اړه مثبته پرېکړه وکړي.»
ښاغلي اوغلو ویلي، د دوحې په راتلونکې ناسته کې د افغانستان بهرنیو چارو وزارت ته بلنه ورکړل شوې او د امارت لوړپوړی پلاوی به پکې گډون وکړي.
د جمهوریت له سقوط وروسته د نړۍ گڼو هېوادونو له افغانستان سره خپلې اړیکې پرې کړې؛ خو اوسمهال د نړۍ په یو شمېر هېوادونو کې د افغانستان سفارتونه فعال شوي او له نړۍ سره د اړیکو جوړولو نوی باب پرانیستل شوی دی.