سعودي ته د بلېنکن سفر؛ اسرائیل لا هم پر غزه درانه بمونه وروي

د امریکا د بهرنیو چارو وزیر انټوني بلېنکن پرون منځني ختیځ ته خپل سفر پیل کړ او پرون یې د سعودي عربستان له ولیعهد محمد بن سلمان سره ولیدل.
د حماس او اسرائیلو ترمنځ د روانې نښتې راهیسې دا د نوموړي پینځم سفر دی، چې منځني ختیځ ته یې کوي؛ خو تر دې مهاله د دواړو خواوو په جگړه کې کموالی نه دی راغلی؛ بلکې اسرائیل لا هم هره ورځ پر غزه درنې بمبارۍ کوي، چې له امله یې تر دې مهاله زرگونه فلسطینان وژل شوي دي او زرگونه ټپیان شوي دي.
ټاکل شوې ده، بلېنکن به په دغه سفر کې د سعودي عربستان سربېره مصر، قطر، اسرائیل او د اسرائیلو له لوري د غصب شوې لوېدیځي غاړې ته هم ولاړ شي.
که څه هم د دغه سفر ښکاره موخه په غزه کې د اوربند ښودل شوی؛ خو امریکا د اسرائیلو پوره ملاتړ کوي او له اسرائیلو سره د مالي مرستې سربېره نظامي مرستې هم کوي.
اسرائیلو پرون هم پر غزې درنې بمبارۍ کړې، چې له امله یې ۱۲۸ ملکي وگړي وژل شوي او سلگونه نور ټپیان شوي دي.
په غزه کې د ملگرو ملتونو د خوړو اداره هم وايي، چې په غزه کې خوراکي توکي کم شوي او د سختې بمبارۍ او ویجاړۍ له امله زرگونه خلک په ۲۴ ساعتونو کې په کافي اندازه خوړو ته لاس رسی نه لري.