د روسیې امنیتي مدیر الکساندر بورتنیکوف ویلي، د مسکو د وروستي برید په تړاو یې ۱۱ تنه نیولي، چې څلور تنه اصلي عاملین هم پکې دي.
روسي رسنیو ویلي، په پېژندل شوو کې ناصرالدینوف، محمد رسول، اسمونوف ریوازیدین، صفول زاده شوخینجان او نظروف رستم ښکېل دي، چې ټول د تاجیکستان اوسېدونکي دي.
امنیتي ادارو ویلي، په ټول هېواد کې د یادو کسانو لټون پیل شوی او د هر شکمن کس د نیول کېدو په اړه هم ورته ویل شوي دي.
تېره شپه د مسکو په کروکس ښار کې په یوه کنسرټ کې شپږو کسانو پر ناستو کې خلکو ډزې پیل کړې، چې تر دې دمه ۷۰ تنه وژل شوي او ۱۶۰ تنه نور ټپیان شوي دي.د یاد برید داعش وسلهوالې ډلې منلی دی.
د افغانستان د بهرنیو چارو وزارت له لوري په مسکو کې پرونی برید غندل شوی دی.
د یاد وزارت ویاند عبدالقهار بلخي له لوري رسنیو ته په لېږل شوې خبرپاڼه کې ویل شوي:«د افغانستان د بهرنیو چارو وزارت د مسکو وروستی ترهگریز برید چې د داعش یې پړه اخیستې په کلکو ټکو غندي او دغه ډول بریدونه د ټولو بشري معیارونو څخه سرغړونه بولي.»
په اعلامیه کې ویل شوي، داعش په افغانستان کې او نړۍ کې یوازې ملکي وگړي په نښه کړي دي.له بل لوري حماس د مسکو وروستی برید غندلی او دغه برید یې ترهگریز برید بللی دی.
د حماس له لوري په خپره شوې خبرپاڼه کې ویل شوي، دغه برید اسرائیلو کړی؛ ځکه اسرائیل او داعش دواړه سره یو دي او د خپلو سیاسي موخو لپاره داسې خونړي بریدونه کوي او د داعش نوم ورته کاروي.