د ریاست الوزراء اقتصادي مرستیال ملا عبدالغني برادر د ایران د ولسمشر ځانګړي استازي او په افغانستان کې د ایران سفیر حسن کاظمي قمي سره لیدنه کړې ده.
د ریاست الوزراء اقتصادي معاونیت د یوې خبر پاڼې په خپرولو سره ویلي، چې په دغه لیدنه کې د سیاسي، اقتصادي، ترانزیتي او سوداګریزو اړیکو کې د پیاوړتیا او په بېلابېلو برخو کې د دوه اړخیزو همکاریو د زیاتوالي په اړه خبرې اترې وشوې.
ښاغلي برادر په دغه لیدنه کې له ایراني چارواکو غوښتي، چې اروپایي هېوادونو ته د افغاني محصولاتو او جامو په ترانزیت او لیږد کې زمینه سازي او همکاري وکړي او په دې برخه کې زیاتې اسانتیاوې برابرې کړي.
په لیدنه کې د ایران سفیر او د دغه هېواد د ولسمشر ځانګړي استازي حسن کاظمي قمي ویلي، موږ چمتو یو چې افغانستان سره د سوداګریزو بانکونو د ستونزو حل، د چاپیریالي ستونزو د له منځه وړلو، زراعت او سوداګریزو برخو او د ایران له لارې نورو هېوادونو ته د افغاني محصولاتو په لیږد کې زمینه سازي او همکاري وکړو.
ایران د افغانستان په ګاونډ کې پروت هېواد دی، چې له افغان حکومت سره ښې سوداګریزې، سیاسي، اقتصادي او هر اړخیزې اړیکي لري.