بهرنیو چارو وزارت د يوې خبرپاڼې په خپرولو سره وايي، چې د ياد وزارت سرپرست وزير مولوي اميرخان متقي په يوه ناسته کې کابل کې د روسیې له سفير دیمیتري ژیرنوف سره د افغانستان او روسیې د اړیکو په نوي پړاو، کازان غونډه کې د شوو تفاهماتو او په دوه اړخیزو کاري کمېټو بحثونه او خبرې کړي.
سرچينه وايي، کابل کې د روسیې سفير ژیرنوف ښاغلي متقي ته د روسیې لپاره د افغانستان د نوماند سفیر د منلو رسمي یادښت سپارلی او هیله یې څرګنده کړې چې د ډيپلوماتیکې کچې لوړېدو سره به د دواړو هیوادونو تر منځ اړیکې په ګڼو برخو کې پرمختګ وکړي.
خبرپاڼه وايي، د هېواد د بهرنیو چارو وزیر په دې ناسته کې له روسیې سره د اړیکو نوی فصل مهم بللی او هیله یې څرګنده کړې چې په دې پړاو کې به دواړه هېوادونه وتوانېږي چې په بېلابېلو برخو کې دوه اړخیزې همکارۍ لا پراخې کړي.
