بهرنيو چارو وزارت د يوې خبرپاڼې په خپرولو سره وايي، چې د ياد وزارت وزير مولوي امير خان متقي او د ايران ولسمشر مسعود پزشکيان د ايران او افغانستان ترمنځ د سياسي او دوه اړخيزو اړيکو پر پراختيا او ايران کې د مېشتو افغان کډوالو په اړه خبرې کړي.
د سرچينې په خبره، پزشکيان په دې ناسته کې دواړه هېوادونه ښه ګاونډيان بللي، افغان کډوالو ته د اسانتياوو په برابرولو یې تاکيد کړی او ويلې یې دي، چې هېواد يې چمتو دی په ټولو برخو کې له افغانستان سره اړيکې پراخې کړي.
له بل لوري ښاغلي متقي هم د دواړو هېوادونو پر مثبتو اړيکو او نږدې همکاريو ټينګار کړی، د دواړو هیوادونو ترمنځ یې د تجارت پر زیاتوالي، د مخدره موادو د قاچاق پر کنټرول او سیاسي اړیکو پر پراختیا تاکید کړی او غوښتنه يې کړې، چې د کډوالو د ستنولو بهير په تدريج ترسره شي او د هغوی چارې او پانګه زيانمن نه شي.
ياده دې وي، چې مولوي اميرخان متقي په رسمي سفر ایران ته تللی او ټاکل شوې له هغه ځايه چين ته ولاړ شي.