له ارګ څخه په خپره شوې خبرپاڼه کې راغلي، چې د ریاست الوزراء اداري مرستیال مولوي عبدالسلام حنفي د هرات ولایت له مرکزي زندان او د ماشومانو د اصلاح او روزنې له مرکز څخه لیدنه کړې او د دغو مرکزونو عمومي وضعیت یې ارزولی دی.
حنفي د تشکیلاتو او تنخواوو د تنظیم کمېسیون د غړو په ملتیا د هرات زندان بېلابېلې برخې کتلي او د محبوسینو د استوګنې ځای، روغتیایي خدمتونه، د خوړو برابرول او وېش، روزنیزې چارې او نورې اړتیاوې یې له نږدې څېړلې دي.
خبرپاڼه زیاتوي، چې نوموړي د ماشومانو د اصلاح او روزنې مرکز د استوګنې، روغتیا، خوړو، ښوونیزو او مسلکي روزنیزو پروګرامونو وضعیت هم ارزاولی او د ماشومانو لپاره یې د مناسب ښوونیز او روزنیز چاپېریال پر برابرولو ټینګار کړی.
د ریاست الوزراء اداري مرستیال له یو شمېر محبوسینو او ماشومانو سره جلا خبرې کړي، د هغوی ستونزې او غوښتنې یې اورېدلي او اړوندو مسوولینو ته یې لارښوونه کړې، چې د دغو مرکزونو اړتیاوې پوره او د خدماتو د ښه والي لپاره لازم اقدامات وکړي.