د پاکستاني رسنیو د راپورونو له مخې، د پاکستان د جمعيت علماء اسلام ګوند يو مشر او ديني عالم مولانا قاضي ظهور احمد بېګا شپه د پېښور د بډه بېرې په احمدخېل سيمه کې له جومات څخه کور ته د تګ پر مهال د نامعلومه کسانو له لوري په ډزو وژل شوی.
د پاکستان د جمعيت علماء اسلام ګوند مشر مولانا فضل الرحمن بيا د قاضي ظهور احمد وژل کېدل په کلکه غندلي او ويلي یې دي چې، حکومت د امنيت په ټينګولو کې پاتې راغلی چې دا کار د پاکستان د سولې او نظم لپاره جدي ګواښ دی.
پاکستان کې د علماوو د ترور وروستيو پېښو ګڼې اندېښنې راپارولي او په دې اړه عام باور دا دی، چې د علماوو او په تېره د جمیعت علماء اسلام ګوند غړي د پاکستاني ریاست له لوري وژل کېږي.