د سرحدونو، قومونو او قبایلو چارو وزارت چارسمبالي وزیر ملا نورالله نوري په پکتیا کې یوې ولسي غونډې ته ویلي، افغانستان به ډېر ژر خپلې پیسې، پاسپورت او وسلې په هېواد کې دننه تولید کړي.
نوموړي په پکتیا کې د سوېل ختیځ زون په کچه د اسلامي نظام او ملي یووالي پیاوړتیا تر سرلیک لاندې جوړشې غونډې ته ویلي، باور لري چې افغانستان د غنمو، تېلو، برېښنا، مېوو، کروندو او په خپل بازار کې پر ځانبسیا شي. افغانستان به خپلې پیسې او پاسپورټ چاپوي او خپلې وسلې به په هېواد کې دننه جوړې کړي.
د نوري په خبره، اسلامي امارت د جگړې پر مهال هم خپلواک و او اوس هم خپلواک دی او په خپلو چارو کې چاته د لاسوهنې اجازه نه ورکوي.: «دا د شکر ځای ده چې یوازې د مشرانو سره د لیدنو لپاره او د قومونو د ستونزو اورېدلو لپاره راجمع شوي یو.
نن د ترکمن، هزاره، پښتون، تاجېک او هر چا ته خپل حقوق ورکول کېږي، ځکه په اسلام کې توپیر نشته، برتري یوازې په تقوا ده، زموږ دا مکلفیت دی چې د اسلامي نظام پالنه وکړو او په ساتنه کې خپل مسؤلیت اداء کړو.»
د اوبو او برېښنا وزیر عبدالطیف منصور یادې ولسي غونډې ته ویلي، زموږ سیاسي فضاء ازاده ده، جغرافیه مو خپلواکه ده، نظام مستقل او خپلواک دی، دا نظام یوازې د مجاهدینو نه دی، دا د دې ټولو خلکو نظام دی، چې قیادت یې د دیني علماوو په لاس کې دی، تاسې که هره غوښتنه لرئ، موږ یې په سر سترگو منو او تر وسه به یې د حل په برخه کې شریکوو.
د سرحدونو، قومونو او قبایلو چارو وزارت له خوا په پکتیا کې د سوېل ختیځ زون په کچه د اسلامي نظام او ملي یووالي پیاوړتیا تر عنوان لاندې لویه ولسي غونډه جوړه شوې وه، چې د سرحدونو، قومونو او قبایلو وزیر ملا نورالله نوري سربېره د اوبو او برېښنا چارسمبالي وزیر عبدالطیف منصور، د کډوالو او راستنېدونکو چارو وزیر محمد خلیل حقاني په گډون د وزارتونو مرستیالانو، دیني عالمانو، قومي مشرانو او سلگونه هېوادوالو پکې برخه اخیستې وه.
