د هلمند ولایت د کرنې، اوبو لگولو او مالدارۍ ریاست وايي، د هلمند بولان څېړنیز فارم کې زرگونه مېوه لرونکي نیالگي روزل کېږي.
د یاد ریاست د مسوولینو په خبره، د طبیعي سرچینو امریت اړوند د بولان د نیالگیو روزلو مرکزي نیالخانه کې زرگونه مېوه لرونکي او زینتي نیالگي تر روزنې لاندې دي.:«په شاوخوا درې جریبه ځمکه کې د ١٨٠٠٠ هغو مېوه لرونکو نیالگیو چې سږکال پیوند شوي دي د اضافي او نا پیونده ښاخونو صفاکاري شوې، چې په تعقیب به یې د اړتیا وړ کیمیاوي سره هم ورکړل شي.»
د هلمند د کرنې ریاست د مسوولینو په خبره، دغه نیالگي چې د مسلکي کارکوونکو لخوا پیوند او روزل کېږي نږدې ٧ ډولونه دي، چې د دې ولایت د خاورې، اوبو او هوا سره ښه توافق لري.: « سږکال دغه نیالگي چې په ترکیب کې یې شفتالو، گرنیگچ ژېړ او سور پلم، زردالو، الوبخارا او الوچې شاملې دي، د هلمندي ځمکهوالو لپاره وېشلو ته چمتو کېږي.»
د کرنې ریاست ویلي، هڅه کوي چې عصري او معیاري بڼوالۍ ته پراختیا ورکړي ترڅو بزگر له خپلو بڼوڼو څخه ښه حاصلات تر لاسه کړي.