د حکومت د رسنیو مرکز د يوې خبرپاڼې په خپرولو سره ويلي چې د رياست الوزرا د اقتصادي مرستيال ملا عبدالغني برادر په شتون کې د افغانستان برېښنا شرکت له لوري د برېښنا د لس سترو پروژو تړونونه لاسليک شول.
د سرچينې په وينا د يادو پروژو مجموعي ارزښت شاوخوا شل میلیارده، اوه سوه دوه پنځوس میلیونه افغانۍ دی، چې د عامه او خصوصي مشارکت او حکومتي بودیجې له لوري به تمويل شي.
سرچينه زياتوي چې دا پروژې له کورنیو او بهرنیو شرکتونو سره لاسلیک شوې، چې ۲۲۸ مېګاواټه بادي، حرارتي (ګازي) او لمریزې برېښنا تولید، د سب سټېشنونو جوړول او مزو غځول پکې شامل دي.
د مالوماتو له مخې په دې تړونونو کې د بلخ ولایت په دهدادي ولسوالۍ کې د ۴۰ مېګاواټه لمریزې برېښنا تولید، په هرات ولایت کې د ۵ مېګاواټه لمریزې برېښنا تولید، په لغمان ولایت کې د ۱۰ مېګاواټه لمرېزې برېښنا تولید، په هرات ولایت کې د ۴۲ مېګاواټه بادي برېښنا تولید(چې د پلان شوي ۲۰۰ مېګاواټه برېښنا د تولیدي پلان لومړی فاز دی)، د لوګر ولایت په محمداغه ولسوالۍ کې د سب سټېشن جوړول، د ننګرهار په شیخ مصري کې د ۴۰ مېګاواټه لمریزې برېښنا تولید، د جوزجان ولایت په شبرغان کې د ۵۰ مېګاواټه حرارتي (ګازي) برېښنا تولید او د لوګر ولایت په محمداغه ولسوالۍ کې د ۴۰ مېګاواټه لمریزې برېښنا تولید پروژې شاملې دي.
همدا راز بيا د برېښنا د مزو غځولو دوه پروژې چې يوه یې له زابل څخه تر کندهار پورې د غځېدونکې پروژې د پاتې چارو بشپړول او په سب سټېشنونو کې یې د SVC سستمونو نصبول او بله له کجکي څخه تر کندهار پورې د ۱۱۰ کیلو ولټ برېښنايي مزو د پاتې چارو بشپړول هم د دې تړون برخه دي.
په پای کې سرچينې زياته کړې چې د برېښنا د یادو تولیدي پروژو تعرفه د پام وړ ټیټه او ځینې یې آن په ۳.۷ سېنټه هم شته.