مسلمان ولسونه، په ځانګړې توګه افغانان د دیني او عصري علم او پوهې د عامېدو له برکته د داسې حکومت ملاتړ کوي، چې کړنلاره یې په واقعي توګه د اسلامي شریعت مطابق وي، د ولس فزیکي او رواني امنیت یې تأمین کړی وي، اقتصادي پروژې او بیا رغونه یې هم په اولویتونو کې وي او ټول ځان پکې ویني. شر او فساد غواړي ولسي ملاتړ په دروغجن شعار د دغسي یو حکومت د بدیل په توګه ځان مطرح کړي، خو نه یې پلان، وړتیا او نه هم ولسي ملاتړ لري.
شر او فساد ډله په مجموع کې له داسې افرادو تشکیل شوې، چې یا خپله د افغانستان د داخلي جګړو پر مهال د هېواد د چور، تالان او بې ګناه وګړو په قتلونو کې مستقیم ښکېل وو، یا یې هم پلرونه پکې ښکېل وو. افغان ولس له دغه هېواد پلورونکو ښې خاطرې نه لري، ځکه تاریخي ریښه یې له بلها خیانتونو سره تړلې ده.
دوی لومړی په ۱۹۹۰مه لسیزه کې د اسلام، جهاد او مجاهدینو له ارمانونو سره وفا ونه کړه، بلکې د یو اسلامي نظام د قیام پر ځای یې د بې ګناه مسلمانانو په وینو لاسونه سره کړه، د قومي ډلو په جوړولو، د قدرت د سمتي جزیرو په ایجاد او خپل منځي جګړو یې لاس پوري کړ.
دوهم ځل یې په ۲۰۰۱م کال کې د ترهګرۍ پر ضد جګړې په نوم په بُن کې ننګین تړون لاسلیک کړ او خپله هغه خاوره چې له اشغاله یې د خلاصون لپاره یو وخت قربانۍ ته تیار وو، د واک په بدل کې وپلورل؛ هېواد یې اشغالګرو ته په واک کې ورکړ، پراخ غصب، د قدرت جزیرو لا قوي کولو، ډیموکراسۍ او سیکولریزم حاکمیت او واشنګټن ساتنې ته یې خورا په اخلاص کار وکړ.
دوه ځله یې ولس ته امتحان ورکړ او دواړه ځله مخ توري له هېواده وشړل شول؛ اوس ځان د یو منظم حکومت بدیل معرفي کوي او د خپل مشروعیت مرجع ولس یادوي، په داسې حال کې چې نه د حکومت لپاره طرحه، نظم، ظرفیت او وړتیا لري او نه د ولس په منځ کې منلي دي.
د شر او فساد ډله د ځان غوښتنې او مطلقیت له سیاست په الهام اخیستنې چې د فاشیزم برخه ده، غواړي پر افغانستان له یوې کورنۍ جوړې شوې انلاین کابینې او تښتېدلو جنرالانو سره د داسې حکومت په بدل کې واک ته ستانه شي، چې د ټولو قومونو، اقشارو او اقلیتونو شتون یې د ولس په منځ کې منل شوی دی.
د شر او فساد ډلې د واضحې او اغیزمنې تګلارې له نشتون سره – سره، د دوی فعالیتونه په رسنیو کې په تبلیغاتو، شعارونو او نړیوال ملاتړ پورې تړلې دي؛ ولسي ملاتړ نه دغه ډلې ته مطرح ؤ او نه یې مهم ګڼي. ولسي ملاتړ یوازې په تبلیغاتي لیکنو کې یادوي.
ولس درک کړې؛ د شر او فساد لارویان په تبلیغاتي کلیپونو د بدلون څه، چې د سر خوږي ځواک لا نه لري. دوی یوازې د جګړو، نا امنۍ او ولسي ذهنیت مغشوشولو سمبولونه دي. فاشیزم، ولس وژنې او تاریخي تېروتنو د دغه ډلې ولسي ملاتړ له منځه وړی او له سقوط سره یې مخ کړې ده، ځکه خو اوس “ولسي ملاتړ” د تبلیغاتي شعار په توګه استفاده کوي.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.
