ټاپي/TAPI پروژه په سیمه کې د سیمه ییز نښلون لویه او په اقتصادي او سیاسي لحاظ سیمه بدلوونکې پروژه ده.
ترکمنستان، افغانستان، پاکستان او هند د دغې پروژې ګډونوال دي؛ د دغې پروژې له لارې د ترکمنستان ګاز د افغانستان له لارې پاکستان او بیا هند ته لېږدول کېږي.
ترکمنستان د ګازو پرېمانه ذخیرې لري؛ د ترکمنستان له دغه ګاز څخه به افغانستان، پاکستان او هند استفاده کوي.
افغانستان به نه یوازې له ګاز څخه مستفید کېږي، بلکې هر کال به شاوخوا څلور سوه میلیونه ډالر د ګاز د لیږد فیس هم ترلاسه کوي.
د دغې پروژې عملي کارونه په ترکمنستان کې پای ته رسېدلي وو، خو په افغانستان کې یې چارې عملاً پیل شوې نه وې چې اوس پیلېږي.
دغه پروژه د ا.ا.ا. اقتصادي معاونیت او بهرنیو چارو وزارت په ګډې همکارۍ او هڅو پیلېږي چې د افغانستان اقتصادي او سیاسي وضعیت به ورسره بدل شي؛ دغه پروژه د سیمې، په ځانګړي ډول د افغانستان نښلون او ثبات باوري کوي.
له لسیزو زموږ په سیمه کې د شته هیوادونو تر منځ بې باوري موجوده ده چې اوس دغه ډول پروژې کولی شي چې د سیمې هیوادونه یو بل ته نږدې او د بې باورۍ فضاء ختمه کړي.
افغانستان چې د ډیرو ګاونډیو هیوادونو تر منځ د رقابت ځای وو، اوس دغه ډول پروژې زموږ د هیواد د ثبات له پاره حیاتي ارزښت پیدا کوي، ځکه ګاونډي هیوادونه، په ځانګړي ډول هند او پاکستان به نور په افغانستان کې د رقابت پر ځای همکاري کوي.
په افغانستان کې د هند او پاکستان ملګرتیا، نږدې والی او د رقابت له منځه تلل د افغانستان د ثبات له پاره ډیر مهم دي.
بلخوا، د سیمې لوی هیوادونه لکه روسیه، چین او ایران هم له دغه ډول پروژو سره حساسیت نه لري او دا د دې بل دلیل چې که خدای کول افغانستان به له لسیزو نارامیو وروسته اوږد مهاله ثبات ته رسېږي.
افغانستان به له دې وروسته د سیمې د هیوادونو د همکارۍ او د مرکزي او سویلي اسیا د نښلون نقطه وي.
داسې څرکونه او هیلې پیدا شوي چې افغانستان به د سیمې نښلون کې خپل پخوانی تاریخي رول بیا ولوبوي او ورسره به افغانستان ثبات او اقتصادي ښېرازۍ ته ورسېږي.
