وروسته له هغې چې څو ورځې وړاندې په سپينه ماڼۍ کې د يوه خبري کنفرانس پرمهال د امريکا د ولسمشر ډونالډ ټرمپ او د اوکراين د ولسمشر ولادمير زيلېنسکي ترمنځ لفظي شخړه رامنځته شوه، تازه ټرمپ اعلان کړی چې زيلېنسکي بايد له ده څخه د کامرو او رسنيو په مخکې بښنه وغواړي.
د امريکا جمهوري غوښتونکو ګوند ته نژدې فاکس نيوز خبري شبکې په يوه راپور کې ويلي چې، ټرمپ له اوکراين سره اړيکې او مرسته هم د زيلېنسکي له لوري له ده څخه تر بښنې غوښتلو پورې تړلې او وايي، که زيلېنسکي ترې د کامرو په مخکې بښنه وغواړي شايد له اوکراین سره مرسته وکړي.
يادې رسنۍ دغه راز د نوم نه ښودلو په شرط د يوه لوړپوړي امريکايي چارواکي له قوله خبر ورکړی چې، له اوکراین سره د مرستو بندولو سربېره د اوکراين په کاني زېرمو معامله هم د زيلېنسکي له لوري د نه بښنې غوښتلو په صورت کې ناممکنه ده.
سرچينې زياته کړې چې، د ټرمپ له دې اعلان وروسته زيلېسنکي کوم غبرګون نه دی ښودلی خو له حالاتو څرګندېږي چې هغه د کامرو پر وړاندې بښنې غوښتلو ته چمتو نه دی.