د پاکستاني طالبانو تحریک (ټي ټي پي) وایي، چې په تېرو شپږو میاشتو په موده کې د پاکستان په بېلابېلو سیمو کې په پاکستاني پوځیانو ۴۹۷ مرګوني بریدونه کړې دي.
دغې ډلې زیاته کړې، چې د دغو بریدونو له امله ۴۸۳ تنه پاکستاني پوځیان وژل شوي، ۶۴۹ تنه سخت ټپیات شوي او ۳ تنه ژوندي نیول شوي دي.
د پاکستاني طالبانو تحریک د پاکستان حکومت مخالفه وسله واله ډله ده، چې تر ټولو زیات ډلییز او هدفي بریدونه همدوی په حکومتي چارواکو او پوځیانو ترسره کوي.
بل لور د جون پر ۳۰ مه په پاکستان کې د تېرو درېیو میاشتو په موده کې د نا امنیو په پېښو کې د وژل شویو کسانو راپور هم خپور شوی و.
یو شمېر رسنیو د پاکستان د امنیتي وضعیت د ادارو په حواله راپورونه خپاره کړي و او ویلي یې و، چې د تېرو درېیو میاشتو په موده کې په دغه هېواد کې په وسله والو بریدونو او نورو بېلابېلو پېښو کې ۳۸۰ تنه وژل شوي و.
په پاکستان کې “د څېړنو او امنیت د مطالعاتو مرکز” په نامه څېړنيزې ادارې د جون پر ۳۰ مه (چنګاښ ۱۰) په خپاره کړي درې میاشتني راپور کې ويلي وو، چې د ۲۰۲۴ په اپرېل، مې او جون مياشتو کې په وسله والو بریدونو او پوځي عملیاتو کې زياتره مرګ ژوبله په خيبر پښتونخوا ايالت او ورپسې په بلوچستان ايالت کې اوښتې ده.
په راپور کې زیاته شوې وه، چې په دغه موده کې ۲۲۹ تنه ټپیان شوي هم وو.
خیبر پښتونخوا او بلوچستان دوه هغه ایالاتونه دي، چې دلته تر نور ځایونو د حکومت وسله مخالفین زیات فعال دي او وخت نا وخت پر حکومتي چارواکو او پوځیانو سخت بریدونه کوي.