کله چې د قوشتیپې کانال د بلخ په کلدار ولسوالۍ کې د ا.ا د رئیس الوزراء مرستیال ملا عبدالغني برادر لخوا افتتاح شو د دې حیاتي پروژې په ضد ځینې غبرګونه منځ ته راغلل او غبرګونونه هم د شمالي ټلوالې د شر او فساد مخکښانو وښودل.
ضیا مسعود، ولي مسعود، احمد مسعود، عطا نور او ګڼو نورو د دوی صاحب نظرانو دا ملي پروژه یوه دسیسه وبلله.
دوی تور پورې کړ چې طالبان له خیبر پښتونخوا او پیښور څخه دلته پښتانه راولي او د ازبکانو، تاجکانو او ترکمن وطندارانو ترمنځ یې ځایوي.
چې په دې پښتنو کې لشکر طیبه، القاعده، لشکر جنګوي او تحریک طالبان پاکستان پورې مربوط خلک شامل دي او طالبان غواړي له شمال څخه دویم وزیرستان جوړ کړي.
دغو پردیپالو په ډېر بې شرمانه ډول وویل که د قوشتیپې کانال تطبیق شي نو د ازبکستان او ترکمنستان په صنعت به خورا بدې اغېزې پرېباسي، همدا ډول به د ترکمنستان او تاجکستان په کرهڼه ډېر منفي اغېز ولري، افغانستان به هغه غنم چې واردوي د غنمو په صادرونکي هېواد تبدیل شي.
موده پس د تاجکستان رسنیو هم د قوشتیپې ضد خپرونې پېل کړې، د افغانستان په تړاو یې بد ذهنیت خپراوه او د قوشتیپې په اړه به بار بار همدا بیان مخې ته راتلی چې طالبان کانال جوړوي که بحر جوړوي؟بیا یې د سالنګونو د جوړولو چارې مسخره کړې، خو افغان حکومت د چا د نیوکو پروا ونه ساتله، د سالنګونو چارې یې هم بشپړې کړې.
څو ورځې وړاندې د هیواد د رئیس الوزراء له لوري د ټاپي پروژې پرانسته په ترکمنستان کې وشوه، همدې بدنامو کړیو په رسنیو کې غوغا پیل کړه چې دا یې پنځمه او شپږمه افتتاح ده چې کېږي مګر دا پروژه نه شي تطبیقولی؛ د دې پروژې د نه تطبیق په تړاو یې د سیمه ایزې اجماع د نشتون، د امریکا او روسیې او چین ترمنځ ناسالم رقابتونه یاد کړل.
خو طبعا هره ملي او حیاتي پروژه چې تطبیقېږي فرصتونه او ننګونې دواړه لري، مګر چلنجونه به د بحران د مدیریت په اساس مدیریت کېږي؛ ښایي بحرانونه کم او فرصتونه ډېر وي، د ټاپي پروژې فرصتونه ځکه ډېر دي چې پاکستان، افغانستان او هند ګازو ته نهایت اړ دي او د ترکمنستان لپاره اقتصادي فرصت دی.
د شاهي کانال چې لغمان کې موقیعت لري د 1403کال د سنبلې پر ٢٥مه افتتاح شو، یو شمېر د همدې کټګورۍ شرارتیانو وغندله، ویل یې چې لغمان کرنیزه ځمکه لږ لري او دا کانال په دومره مصارفو نه ارزي.
کانالونه که بېخي ځمکې خړوب هم نه کړي د نهالونو د زرغونېدو برسېره د اوبو سطحه لوړوي، د تودوخي په کمېدو کې مرسته کوي، کاربن دای اکساید راکمېږي او د اکسیجن ګراف لوړېږي، په کوهیانو کې د اوبو رګونه غوړېږي چې دا خپله د ځمکې په ابادي د خلکو په روغتیا او سرسبزۍ کې خورا بې بریده مثبته اغېزه کوي.
موږ به کار کوو پرديپال د شر او فساد ډله دې شرارتونه کوي، هغوی ته بې له چیغو او نیوکو نور څه نه دي پاتې؛ ولس به خپل نظام ته تکیه وي او نظام به په توکل د خدای لویې او حیاتي پروژې تطبیقوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
