د پنجشېر امنيه قومندانۍ په يوه خبرپاڼه کې وايي، چې امنيتي ځواکونو نن پنجشنبه سهار ٨ بجې درې کسان، چې غوښتل یې د ياد ولايت په عنابه ولسوالۍ کې يو فيلډر موټر غلا کړي، نيولي دي.
د سرچينې په خبره، درې تنه غله د موټر د غلا کولو له هڅې وروسته د تېښتې په حالت کې وو چې د امنیتي ځواکونو د چټک اقدام له امله د دلان سنګ په سيمه کې له موټر سره یوځای نيول شوي.
د پنجشېر امنيه قومندان قاري احمدالله بدر د امنیتي ځواکونو د چټک اقدام ستاینه کړې او ټینګار یې کړی چې دغه ډول مجرمان به د قانون سره سم مجازات شي، ترڅو نور کسان له ورته غیرقانوني کړنو ډډه وکړي.