د پنجشېر ولايت مقام د رسنيو دفتر په يوه خبرپاڼه کې وايي، چې د ياد ولايت د والي حافظ محمد آغا حکيم په ځانګړې لارښوونه د تېرې اوونۍ په لړ کې د ياد ولايت په حصه اول، دره او پريان ولسوالۍ کې د واورې ښويېدنې له امله زيانمنو خلکو ته د مرستې رسونې عاجله کمېټه جوړه شوې ده.
د سرچينې په خبره، د پنجشېر ولايت د پېښو پر وړاندې د مبارزې رئيس محب الله جاهد وايي چې، د واورې ښويېدنې په پېښو کې تر دې مهاله له حصه اول ولسوالۍ څخه د يوه تن جسد پيدا شوی او د نورو د لټون هڅې روانې دي.
سرچينه زياتوي چې، د پېښو پر وړاندې د مبارزې رياست په دره او پريان ولسوالۍ کې له زيانمنو کورنيو سره نغدي مرستې کړي او همدا راز به په حصه اول ولسوالۍ کې هم نغدي مرستې ووېشي.