په اسلاماباد کې د افغانستان سفارت وايي، د افغانستان سفیر سردار احمد شکیب او مل پلاوي د پاکستان د سِفران وزیر سره لیدلي او په پاکستان کې د مېشتو افغان کډوالو په ستونزو یې ورسره خبرې کړې دي.
د سفارت مقام څخه په خپره شوې خبرپاڼه کې ویل شوي، په دې لیدنه کې پاکستان ته د کډوالو په چارو کې د ملگرو ملتونو د کمېشنر د سفر په رڼا کې د کډوالو پر وضعیت، ستونزو او وروستیو پرمختگونو خبرې شوې دي.
د پاکستان د سِفران وزیر ویلي، افغان کډوالو ته یې POR کارتونو موده د یو کال لپاره غځولې ده.:«پاکستان د کډوالو اجباري اخراج نه غواړي، بلکې د هغوی د باعزته او په خپله خوښه ستنېدو غوښتونکی دی.»
افغان سفیر ویلي، که پاکستان د افغان کډوالو لپاره د کارتونو موده نوره هم وغځوي ښه به وي.: «اسلامي امارت هم غواړي چې کډوال په خپله خوښه بېرته خپل وطن ته ستانه شي، کډوال زمونږ خپل خلک دي او ورته ښه راغلاست وایو. په دې برخه کې افغان حکومت د لوړې کچې کمېټې تشکیل کړې او هڅه کوي چې کډوال په ډېر عزت سره خپل هیواد ته ستانه شي.»
نوموړي ویلي، په تېرو ۴۰ کلونو کې افغان کډوالو چاته زیان نه دی رسولی، بلکې د پاکستان په اقتصادي پیاوړتیا کې یې مهمه ونډه هم اخیستې ده.
له همدې امله امنیتي موضوعات او سیاسي اړیکې باید له کډوالو سره ونه تړل شي.
په خبرپاڼه کې ویل شوي، لیدنه کې د افغانستان سفارت د کډوالو آتشې، سفران وزارت او افغان کمېشنرۍ ترمنځ د گډې کمېټې د جوړولو وړاندیز وشو ترڅو د کډوالو اړوند ستونزو ته پر وخت رسېدنه وشي.