د کورنیو چارو وزارت په شخصي موټرونو کې د دولتي هارنونو، اشارو او دولتي نښو په لگولو بندیز لگولی دی.
له یاد وزارت څخه په خپره شوې خبرپاڼه کې ویل شوي، که چېرته شخصي موټرونو کې دولتي هارنونه گېر شي؛ نو له سرغړوونکو سره به قانوني چلند وکړي.: «د اسلامي امارت د مشرتابه عالي مقام د (۱۵۲۰) ګڼه فرمان پر بنسټ او د کورنیو چارو وزارت د مشرتابه د هدایت له مخې د شخصي موټرونو خاوندانو ته خبر ورکول کېږي چې په شخصي وسایطو کې د دولتي هارنونو، اشارو او نورو دولتي نښو د لگولو څخه ډډه وکړي، له سر غړوونکو سره به قانوني چلند کېږي.»
د کورنیو چارو وزارت یاد اقدام داسې مهال کړی، چې اوسمهال د کابل سربېره د هېواد په گڼو لویو ښارونو کې شخصي موټرونو کې هم دولتي هارنونه لگول شوي، چې عام خلک ترې تر پوزې راغلي دي.
د دې سربېره ځینې شخصي موټر چلوونکو د افغانستان اسلامي امارت د ځینو مشرانو، ریاستونو او نورو دولتي ادارو نښانونه هم لگولي دي.
عام خلک د کورنیو چارو وزارت اوسنی اقدام ستایي او هیله لري چې یادو موټرچلوونکو ته دې سخته سزا ورکړل شي چې په خپلو شخصي موټرونو کې دولتي هارنونه، اشارې او دولتي نښې لگولي.