په افغانستان کې له شل کلنې جګړې او د اوسني حکومت له واکمنېدو وروسته، تل دا پوښتنه مطرح کېدله چې ایا نوی حکومت به د وضعیت د مدیریت له ازموینې راووځي او که نه!؟ ځکه دا هغه وخت و چې له افغانستانه بهرني ځواکونه وتلي وو، د دوی په ملاتړ جوړ شوی حکومت هم پرځېدلی و، ورسره پر افغانستان سخت بندیزونه ولګېدل او په نړۍوالو رسنیو کې یې هم پر وړاندې منفي تبصرې او څرګندونې په ډېرېدو وې، خو له نږدې څلور کلن مزل وروسته، اوسنۍ ارزونې معکوسې دي، وضعیت مدیریت شوی او تر دې چې د افغانستان اوسنی حکومت په ډېرو حساسو او مهمو شېبو کې د نړۍ د یو مهم هېواد «روسیې» له خوا په رسمیت وپېژندل شو. دا حالت د سرپرست حکومت لاسته راوړنه او په ټوله کې د افغانستان لپاره ښه خبر ګڼل کېدای شي.
اوسنۍ نړۍ چې څو قطبي شوې، د پخوا په خلاف اوس ټول د امریکا رضایت او ناراضۍ ته نه ګوري او نه هم امریکا اوس د پخوا په څېر هغه بر لاس لري چې هر څه دې د دوی له خوښې سره سم مخکې ولاړ شي.
د تېرو څو کلونو نړۍوالو سترو مسایلو څو قطبي نړۍ او د امریکا د یکه تازۍ زوال په ډاګه کړل. اوس چې یو مهم هېواد «روسیې» د افغانستان سرپرست حکومت په رسمیت وپېژانده، د امریکا او غرب یکه تازي یې لا نوره هم چلېنج کړه، ځکه امریکا او متحدینو یې په افغانستان کې له ماتې وروسته، پز دغه هېواد بندیزونه ولګول، مخالفو وسلوال ته یې کمپاین پیل کړ او د اوسني افغان حکومت له رسمیت پېژندنې یې انکار وکړ، دغه راز یې د دې کار لپاره ګڼ شرطونه او فرمایشونه وړاندې کړل چې د تفاهم ژبه یې لا سخته کړه.
ویل کېږي د روسيې له دغه اقدام وروسته، ګڼ نور هېوادونه هم هڅه کوي چې د افغانستان اوسنی حکومت په رسمیت وپېژني، ځکه دوی له وړاندې په تېرو نږدې څلورو کلونو کې له افغانستان سره نسبي ښې ډيپلوماټیکې، سیاسي او اقتصادي اړیکې درلودې او یواځې دغه ډول اقدام ته په تمه وو. د روسیې له دغه اقدام وروسته، اټکل دا دی، چې په راتلونکي کې چین، د منځنۍ اسیا ځینې هېوادونه، ځینې عرب هېوادونه، ترکیه، ایران، هند او پاکستان هم ورته اقدام وکړي او دا چاره به لوېدیځ هېوادونه او په ځانګړې توګه امریکا تر فشار لاندې راولي چې په خپلو اوسنیو پالیسو له سره غور وکړي او له مجبورې ورځې له افغانستان سره رغنده تعامل ته را وړاندې شي.
دا او په راتلونکي کې دې ورته اقدامات د افغانستان او ټولې سیمې لپاره ګټور ښکاري، ځکه په دې سره د افغانستان ثبات لا پیاوړی کېدای شي، له اوسني منزوي حالت او بندیزونو به راووځي، اقتصاد، سوداګري، په نړیۍواله کچه مشروعیت او دريځ به یې لا پیاوړی شي او په سیمه کې به د اقتصادي تحرکت او ثبات په نوي ځواک بدل شي. په افغانستان کې به پراخو رغنیزو او اقتصادي زېربنايي کارونو ته زمینه برابره شي او دا د یوه داسې هېواد لپاره تر ټولو ښه زېري دي چې له لسیزې بحراني حالت څخه تازه راوتلی وي.
دغه راز په دې سره به هغه مخالفې ډلې ټپلې، ځینې سیمه ییزې او نړۍوالې شریرې استخباراتي کړۍ لا پسې منزوي او او د زوال په لور لاړې شي، چې غوښتل یې له افغانستان څخه دا فرصتونه واخلي او بېرته یې د جګړې او بې ثباتۍ په ډګر بدل کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.