د ازموینو ملي اداره وايي، د کانکور ازموینې پینځم یا وروستي پړاو ازموینه یې په کابل کې اخیستې ده.
له یادې ادارې څخه په خپره شوې خبرپاڼه کې د ازموینو ملي ادارې چارسمبالي عبدالباقي حقاني له قوله ویل شوي، چې د سږکال لپاره د وروستي پړاو ازموینه واخیستل شوه.
نوموړي ځوانان زدهکړې، پوهې، ځان جوړونې او د هېواد بسیا کېدو ته راوبلل.:«خوښ یوو چې تاسې ځوانانو د زدهکړې یوه برخه چې تر دولسم ټولگي پورې وه، بشپړه کړه او د دویمې برخې لوړو زده کړو لپاره ازموینه ورکوئ.»
نوموړي ویلي، که موږ او تاسې خپل هېواد له نورو هېوادونو سره مقایسه کړو، د هغوی هېوادونه جوړ دي، خو زموږ هېواد بیا هغسې جوړ نه دی؛ ځکه چې په دې خاوره باندې دوه اشغاله تېر شوي دي، چې دغو اشغالونو او جگړو د نورو مشکلاتو ترڅنگ زموږ علمي ډگر هم کمزوری کړی دی.: «د دې هېواد راتلونکی په تاسې ځوانانو پورې اړه لري؛ نو تاسې زده کړې وکړئ، ځان جوړ کړئ، دا هېواد تاسې له دې مشکلاتو او پرېشانیو ویستلی او خودکفا کولی شئ، خو د دې هر څه نه لومړی که نیت برابر کړو، چې دین، ولس او هېواد ته به خدمت کوو.»
ښاغلي حقاني وویل، هېوادوال مو پر موږ حق لري، چې د ازموینې په برخه کې ورته اسانتیاوې برابرې کړو، سږ کال مو د کانکور ازموینې د ټولو پړاوونو گډونوالو ته بېلابېلې اسانتیاوې برابرې کړې وې.: «سږ کال په کانکور ازموینه کې د ځوانانو ترڅنگ یو شمېر هغو کسانو چې عمرونه یې لوړ وو، هم گډون کړی وو، د دوی ترڅنگ ګڼ شمېر ناروغانو او حتا یو زنداني ته چې د ازموینې ورکړې شرایط یې پوره کړي وو، دازموینې ورکړې اسانتیا چمتو کړې وه.»
نوموړي ټولو ته ډاډ ورکړ، چې د کانکور ازموینه شفافه ده او هېچاته پکې د لاسوهنې اجازه نه ورکول کېږي او نه به د بل حق خوړل کېږي.
د یادونې وړ ده، چې د ۱۴۰۳ کال کانکور ازموینه په پينځو پړاونو وېشل شوې وه، چې وروستۍ متفرقه ازموینه په کابل کې واخیستل شوه او پایلې به یې هم ډېر ژر اعلان شي.
